Përgjigjja e Cameron-it ndaj trazirave ka ngjallur diskutime

Janë arrestuar më shumë se një mijë vetë pas trazirave në Londër e në qytete të tjera të Britanisë së Madhe. Dhe të gjithë po presin të kalojnë në sallën e gjyqit. Një pjesë syresh e kanë marrë dënimin, dhe një pjesë e mirë e opinionit publik nuk kanë munguar t’i përshëndesin këto vendime gjykatash. Edhe kryeministri David Cameron ka bërë të njëjtën gjë. Përveç kësaj, ky i fundit ka dhënë sinjale se nuk ka ndërmend të mjaftohet me kaq. Deklaratat e forta publike lidhur me prindërit e këqinj, me një si degjenerim moral në shkallë kombëtare (togfjalëshin “degjenerim moral” jeni të lutur të mos e merrni në kuptimin e holluar që përdorej në kohën e Hoxhës), dhe me sub-kulturat e pervertuara që gjenden në metropole e qytete të mëdha, ai do t’i shoqërojë me masa të tjera, të cilat duket se janë të diskutueshme. Ai ka kërcënuar, se kundravajtësve do t’u heqë emrat nga programet e asistencës qeveritare, dhe se ata, tok me familjet e tyre, do të largohen nga apartamentet publike që u janë dhënë për banim (një në gjashtë britanikë jeton në apartamente të tillë). Ka edhe më. Ka kërcënuar se në rrethana të mundshme trazirash të tjera do të bllokojë aksesin në rrjete sociale online, të llojit twitter.

Është kjo zgjidhja e duhur? Gazeta New York Times, në një editorial të vetin në versionin online, i vlerëson këto masa si sektare, të padobishme, dhe të rrezikshme. “T’i bësh të varfërit më të varfër nuk do të thotë se ata do t’i largohen vjedhjes. T’u marrësh shtëpitë, nuk do të thotë se ata do ta respektojnë ligjin më shumë. Të bllokosh internetin në zonat periferike është një dhunim i qartë i lirive civile; do të thotë gjithashtu t’i privosh qytetarët e tjerë nga e drejta për t’u informuar në kohë reale”, thuhet mes të tjerash në këtë editorial.

E.G.