Avokati arsyeton lirimin e klientit: është besimtar dhe kontribues i PD-së

“Ka dhënë kontribut për Partinë Demokratike dhe është besimtar”. Këto ka listuar para gjykatësit të cështjes avokati i Gazmend Sallakut, drejtor i stadiumit kombëtar “Qemal Stafa”, i arrestuar me akuzën e korrupsionit pasiv. Gjykatësi, megjithatë e ka hedhur poshtë kërkesën e avokatit për ta liruar Sallakun duke e dënuar atë me 30 ditë paraburgim në pritje të procesit gjyqësor që, pasi të krahasojë provat e prokurorisë me argumentet e mbrojtjes, do të marrë edhe vendimin. Avokati ka paraqitur edhe një raport mjekësor që aludonte për gjendjen jo të mirë shëndetësore të klientit të tij. Moda e raporteve mjekësore dhe përdorimi i tyre për të mundësuar lirimin me kusht të të akuzuarve, është e njohur tashmë. Nga një artific i tillë ka përfituar para pak javësh një tjetër i arrestuar për korrupsion, biznesmeni i naftës, Iljaz Fisheku: avokati ka paraqitur një raport mjeku sipas të cilit i pandehuri kishte probleme me zemrën. I liruar me kusht duke kaluar në arrest shtëpie Fisheku është arratisur disa ditë më vonë. Sa i takon pretendimeve “Gazmend Sallaku ka kontribuar për Partinë Demokratike dhe është gjithashtu besimtar” ato sjellin jo vetëm risi në jurisprudencë, por edhe në logjikë. Asnjëra nga të dyja nuk të jep imunitet, në asnjë rast.  

L.A.