Olldashi “i dyshuar për kontrabandë droge”; flet për Bechtel-in

Zyrtari i parë shqiptar, që merr mundimin të komentojë materialet e WikiLeaks-it lidhur me Shqipërinë, është Sokol Olldashi, për të cilin në një nga këto kabllograme thuhet se “është i dyshuar për kontrabandë droge”.  Nuk duhet shumë mend për të besuar që e ka urdhëruar Berisha ta bëjë këtë. Dhe e ka urdhëruar, me sa duket, të flasë për një çështje tjetër, ku ai vetë preket më shumë politikisht se sa personalisht, e jo për dyshimet e amerikanëve për përfshirje të tij në kontrabandën e drogës. Çështja tjetër është shqetësimi i kompanisë Bechtel në fund të vitit 2008 mbi ngutin e Berishës për të lidhur axhendën e tij elektorale me axhendën e punimeve të Bechtel-it.

Dhe Olldashi përgjigjet në mënyrën e vet, ashtu si askush tjetër në këtë rrethanë. Ai vë në dyshim autenticitetin e këtyre dokumentave. “Nuk kam asnjë konfirmim që ky është një informacion që ka dalë nga Ambasada Amerikane”, shprehet ai. “Nuk ka asnjë deklaratë të drejtorit të Bechtel-it, ju mund t’i drejtoheni vetë Bechtel-it zyrtarisht”, thotë ai më poshtë, duke e ditur se Bechtel-i nuk ka asnjë detyrim e asnjë dobi të japë shpjegime pas këtij lajmi. Dhe në fund, Olldashi, i sigurtë që po tregohet shumë inteligjent, bën një deklaratë, me anë të së cilës “na zë mat të gjithëve”: “E provoni dot që është shkresë e zotit Withers? Nëse e provoni, atëherë hajdeni më pyesni dhe unë do ju përgjigjem”.

Re.Pu.