Riemërimi i kollajtë i Fullanit

Pritej një përplasje e re midis Presidentit e maxhorancës me rastin e emërimit të guvernatorit të ri të Bankës së Shqipërisë. Por asgjë e tillë nuk ndodhi. Maxhoranca propozoi Ardian Fullanin, dhe Presidenti e dekretoi pa u menduar dy herë, duke dhënë përshtypjen se gjëja ka qenë e kopsitur. Por nuk ka gjasa që të jetë kështu. Duhet besuar se Presidenti ka dashur t’i bindë të gjithë se nuk është ai burimi i sherrit, dhe se është maxhoranca që i kundërvihet atij, e jo ai maxhorancës. Dhe me këtë dekretim të lehtë, ai ka synuar t’ia bëjë disi më të vështirë Berishës refuzimin e kandidaturave të tjera, që do duhet të dekretohen nga Presidenti e më pas të miratohen në Kuvend.

Menjëherë  pas dekretimit ka reaguar Edi Rama: “[Fullani] nuk është kandidaturë e gabuar, është kandidatura më e gabuar. Mundësia e një mandati të dytë për zotin Fullani, është pamundësi për të riparuar dëmet e konsiderueshme të mandatit të tij të parë. Për interesin e financave kombëtare dhe të popullit shqiptar, uroj që rrjedha e rrezikshme ku kanë hyrë punët me financat e këtij populli të ndalet një orë e më parë. E kështu as Presidenti Topi, bashkë me votuesit e mundshëm në Kuvend të kësaj kandidature 100% të gabuar, të mos kenë asnjë arsye të pendohen.”  

Një reagim i pritshëm. Dhe logjik.

M.N.