Gary Q. Kokalari Clinton-it: Mos i beso Berishës dhe Arvizu-së

Gary Q. Kokalari, një shqiptaro-amerikan shumë i apasionuar pas vendit të të atit e të gjyshërve të vet, i ka bërë një letër Sekretares amerikane të Shtetit, Hillary Clinton-it, në prag të takimit që kjo e fundit ka planifikuar me kryeministrin shqiptar. Letra është e gjatë, dhe shtjelluese, por ka dy momente që të tërheqin vëmendjen për shkak të konsideratave personale që ka autori i saj lidhur me dy njerëz me shumë ndikim në punët e Shqipërisë, Sali Berisha e Alexander Arvizu.

Për Berishën: “Gjatë viteve kam pasur marrëdhënie të shumta me Sali Berishën, dhe të jem i hapur, besoj se ai është një gënjeshtar patologjik, i pamëshirshëm dhe nuk është veçse një diktator komunist i korruptuar. Përveç faktit që disa agjenci mbikëqyrëse e kanë përshkruar si një nga qeveritë më të korruptuara në botë, disa nga akuzat që i citohen shpesh Berishës përfshijnë vrasje, manipulim votash, pengim të drejtësisë dhe përpjekje për të shtypur fjalën e lirë. Nuk ka asnjë dyshim se rrënjët e problemeve politike me të cilat përballet Shqipëria janë tek Sali Berisha dhe ai është pengesa kryesore për progresin e vendit si demokraci.”

Për Arvizu-në: “Nuk jam i sigurt nëse është stili i ambasadorit Arvizu ose ka ndodhur diçka në strategjinë e DASH-it për Shqipërinë, por ka pasur një ndryshim të dukshëm me vendosjen e tij si ambasador. Disa spekullojnë se kjo është për shkak se Berisha ka shpenzuar një pasuri për lobistët, që njihen se kanë lidhje me administratën e tanishme, por unë shpresoj se ky është vetëm një supozim. Në rastin më të mirë, ambasadori mund të jetë vetëm duke u përpjekur të fusë fijen e perit në gjilpërë duke balancuar komentet e tij në lidhje me marrëdhëniet e qeverisë së Berishës me opozitën. Por më duket se në shumë raste të panevojshme, ambasadori Arvizu i ka dhënë Berishës përfitimin e dyshimit, veçanërisht në lidhje me vrasjen e katër protestuesve shqiptarë më 21 janar.”

Re.Pu.