Presidenti Topi i bën jehonë gjestit të Presidentëve të vendeve të BE-së: bojkoton Janukoviçin

Presidentët e Gjermanisë, Austrisë, Italisë, Kroacisë, Estonisë, Slovenisë, Bulgarisë, Republikës çeke, etj, kanë njoftuar se nuk do të jenë në summit-in e Europës Qendrore e Juglindore në Kiev më 11-12 maj. Dhe ky gjest, me siguri i koordinuar, është bërë për t’i dhënë një sinjal presidentit ukrainas, Viktor Janukoviç, i cili mban të burgosur prej kohësh, dhe keqtrajton, kundërshtaren e vet politike, Julia Timoshenko. Ky summit u mbajt vjet në Poloni, dhe aty morën pjesë 20 krerë shtetesh të rëndësishëm, përfshirë dhe Barack Obama-n. Ndërsa këtë vit, Janukoviçi ka rrezik të mbetet ligsht. Përveç kësaj, presioni në rritje po i bën organizatorët e kampionatit Europian që do të luhet në Ukrainë të kërkojnë zgjidhje të tjera “ndëshkuese”; ende nuk është marrë ndonjë vendim (nuk është e lehtë), por aluzionet e bëra mjaftojnë për ta bërë situatën e Janukoviçit të vështirë.

Në këtë kuadër, erdhi sot dhe vendimi i Presidentit tonë, Bamir Topi. “Po them në mënyrë të qartë që do të bojkotoj këtë takim, [por më duhet të nënvizoj] se ky bojkot nuk bëhet ndaj vlerave të summit-it të Presidentëve, po ndaj vendit mikpritës: jo ndaj Ukrainës, si vend, por pikërisht ndaj standardit të demokracisë”, u shpreh ai.

Me siguri është një vendim i marrë në bashkëpunim me aktorët e tjerë. Më saktë, nën sugjerimin e këtyre të fundit.

E.G.