Policia është e tëra gjobëvënëse

Dje bëra shënimin me titull “Policë të qarkullimit rrugor? Jo, gjobëvënës” (shih linkun: http:/www.respublica.al/artikuj/2012/4/30/police-te-qarkullimit-rrugor-jo-gjob...). Ish një shënim i bazuar tek vëzhgimet e ditëpërditshme që unë kam bërë; besoj, secili ka pasur mundësi ta bëjë këtë vëzhgim. Sot, Shqipi njoftonte se të njëjtin vëzhgim (në sektorin, dhe nga optika, e vet) e ka bërë Drejtori i Policisë së Shtetit, Hysni Burgaj, në analizën tremujore: “Vihet re se çdo ditë ka qindra gjoba të vendosura për makinat nga patrulla e përgjithshme, ndërkohë që detyrat e tjera të tyre, duket se janë lënë mënjanë. Patrulla duhet të kryejë edhe detyrat e tjera funksionale, ose ndryshe do na duhet t’ia heqim kompetencën e vendosjes së gjobave për kundërvajtje rrugore”.

Me sa duket, gjobëvënia qënka një flamë që paska kapur të gjithë policinë. Nuk janë pra vetëm policët e qarkullimit rrugor që u qepen makinave në rrugë; qënkan dhe policët e rendit, të cilëve një dreq e di se pse u qënka njohur e drejta për të vënë gjoba. Nuk mjaftojnë policët me bllok në dorë që të fanepsen kudo nëpër rrugët e Tiranës?

M.Nano