Meta, ky “lobues” i një takimi Berisha-Rama

Shqiptarja.com raportonte sot duke iu referuar burimeve nga takimi PD-LSI në kuadër të negociatave për zgjedhjen e presidentit, se Ilir Meta i kishte kërkuar Berishës që të takohej me Ramën për të diskutuar në lidhje me këtë çështje duke marrë në këmbim edhe përgjigjen e Kryeministrit: Jo, jo, nuk takohem unë me Edi Ramën; e kam personale me të; ai më ka rrethuar më 21 janar (http://respublica.al/artikuj/2012/5/26/berisha-me-ramen-e-kam-personale-me-ka-rrethuar-me-21-janar) . Nuk kaloi as 24 orë nga ky takim dhe përsëri Meta flet për një takim të domosdoshëm midis krerëve të partive më të mëdha politike në vend. Deklarata u bë sot paradite gjatë aktivitetit për zgjedhjen e Kryetares së Forumit të Gruas së LSI-së.

Madje për të parashtruar këtë kërkesë, Meta dha edhe një shembull nga një vend Afrikan, Zimbabve; Para një jave, në Vjenë takova një figurë të njohur për mua. Takova Morgan Zvangerai, i cili është Kryeministri i Zimbabves. Ralfi (Ralf Gjoni sh.r), sekretari i marrëdhënieve ndërkombëtare më tha: Po ky, si ulet çdo javë me Mugaben dhe diskutojnë për të ardhmen e Zimbabves, duke patur parasysh se sa shumë njerëz janë vrarë, se sa shumë njerëz ka humbur dhe Zvangerai gjatë viteve të rënda të opozitës? Dhe natyrisht Zvangerai ulet me Mugaben i cili ende vazhdon të jetë Presidenti i Zimbabves, jo sepse ka harruar të kaluarën, jo se ka harruar të vrarët, jo se ka harruar manipulimin e zgjedhjeve, por se ai e di shumë mirë se, në rast se nuk do të ulen, akoma më shumë njerëz do të vriten në Zimbabve. Ndaj, ngritja mbi të kaluarën është një kërkesë imediate e politikanëve kudo. Është një kërkesë imediate edhe për ne politikanët këtu në Shqipëri”, - ishte fjala e Metës për këtë çështje.

S.E.