Maqedonasit pretendojnë se janë afër zbardhjes së plojës së Smillkovcit

Dikush në Ministrinë e Punëve të Brendshme të Maqedonisë është i dhënë pas latinishtes, gjë që duket tek emri i kodifikuar i operacionit për kapjen e autorit, apo autorëve, të vrasjes së pesë perosnave, mes të cilëve katër të rinj 18-20 vjeç; që të pestë me kombësi maqedonase. Monstrum, e kanë quajtur, dhe sipas shumë gjasave, për pagëzimin e këtij operacioni duhet të jenë nisur nga lloji i krimit dhe i autorëve. Krimi në fakt ishte monstruoz.

Rezultati? Kanë arrestuar 20 persona në disa lagje të Shkupit, ku një pjesë e të arrestuarve dyshohet se kanë lidhje me vrasjen në Smillkovc. “Në mesin e 20 të arrestuarve, ka persona të cilët kanë lidhje drejtpërdrejt me vrasjen makabre në liqenin e Hekuranës, pranë fshatit Smillkovc. Por, ka dhe të tillë, për të cilët nuk kemi të dhëna konkrete se drejtpërdrejt janë të përfshirë në këtë vrasje. Ata po merren në pyetje për momentin, dhe pasi të realizohen hetimet, do të dalim me të dhëna tjera”, ka deklaruar ministrja e Punëve të Brendshme të Maqedonisë, Gordana Jankullovska.

Nuk u përmend nacionaliteti i të arrestuarve, por u la të nënkuptohet feja e tyre. “Islamikë ekstremistë”, u tha, gjë që të bën të mendosh se janë shqiptarë, ose të lidhur me shqiptarët.

Re.Pu.