Ksera: Do vijojmë uljen e papunësisë. Sa mirë! Po si?

Ministri i Punës, Spiro Ksera deklaroi paraditen e sotme se qeveria ka arritur të mos lejojë rritjen e papunësisë, madje mundësoi uljen e saj, ndryshe nga vendet e tjera që u prekën nga kriza. “Shqipëria është nga të paktat shtete të rajonit që ka një ulje të papunësisë dhe rritje të punësimit. Po t'i referohemi shifrave, nivelin e papunësisë e kemi zvogëluar në masën 13.26 për qind dhe synojmë që në fund të këtij viti kjo të minimizohet në masën 13 për qind”, - tha ai. Deklaratë e nxitur nga konteksti apo jo (u bë gjatë hapjes së Panairit të Punës), duket se ajo është paksa e nxituar në realitetin e sotëm, referuar edhe shifrave zyrtare.

Sa gjasa ka ulja e mëtejshme e papunësisë (kur 2011-a u mbyll me rritje) dhe ku do të bazohet ajo? Ndërtimi ka qenë një ndër sektorët me numrin e të punësuarve më të madh në vend. Sot deklarohet në krizë, ndërsa INSTAT raporton për një tkurrje prej më shumë se 20 për qind të tij që prej vitit 2009. Ndërtuesit i janë përgjigjur kësaj situate duke ulur pagat dhe duke shkurtuar stafin.

Vijmë tek fasoni, i cili deklarohet të ketë punësuar rreth 100 mijë persona. Eksporti i tekstileve pësoi një rënie prej 500 milionë lekë në tremujorin e parë të këtij viti krahasuar me të njëjtën periudhë të një viti më parë, ndërsa prodhuesit deklarojnë se kanë shkurtuar punonjësit (http://respublica.al/artikuj/2012/4/27/bie-eksporti-i-tekstileve-sektori-shkurtoi-25-te-punonjesve). Industria ndërkohë, u paraqit me rënie gjatë fundit të 2011-ës krahasuar me të njëjtën periudhë të një viti më parë. Sektori publik nga ana tjetër e ka të përcaktuar me ligj në buxhetin e shtetit që të mos kalojë numrin prej rreth 89 mijë personash të punësuar në të, pra nuk mund të hapë vende të reja pune. Në fund të 2011-ës, Shqipëria e mbylli vitin me 868 të papunë të rinj sipas INSTAT, ndërsa treguesi i papunësisë arriti në 13.29 për qind nga 13.26 për qind që ishte në fund të qershorit 2011.

S.E.