Ka filluar ankandi i partive të vogla

Trysnia për ndryshimin e sistemit zgjedhor është rritur ditët e fundit nga partitë e vogla, opozitare dhe pozitare. Milo dhe Ndoka, në opozitë, dhe Meta e Medihu, në pozitë, kanë ngritur zërin me forcë për një ndryshim të sistemit aktual që do të përputhej me parimin kushtetues të barazisë së votës. Dy të parët kanë lënë të kuptojnë publikisht se mund të dalin nga koalicioni opozitar, në qoftë se nuk ndryshohet sistemi. Ndërsa dy të dytët, nuk kanë shkuar deri tek kërcënimi publik për dalje nga koalicioni qeveritar, por tensioni ndihet në ajër.

Në këtë situatë, Tritan Shehu i PD-së, duke folur për Ora News, ka thënë se Rama po mbyt aleatët e opozitës dhe, si rrjedhojë, ata tentojnë të drejtohen ndaj Sali Berishës, që është mjeshtër i koalicioneve. “Berisha është mjeshtër i koalicioneve. Këta kolegë të këtyre partive kanë lënë të kuptohet se ambjenti brenda të djathtës është më përfitues dhe krijon hapësira. Berisha di të realizojë detyrimet e tij, ndërsa Rama jo dhe krijon një ambjent mbytës për koalicionin”-tha ai.

Nga ana tjetër, dje ka ndodhur një arrestim i bujshëm – i një miku të ngushtë të Fatmir Medihut, biznesmen në Fier që merret me ndërtime pallatesh e rrugësh dhë që është anëtar republikan i këshillit bashkiak atje. Ai u arrestua për llogari të drejtësisë italiane ndërkohë që ishte dënuar që në vitin 2002 me 16 vjet burg dhe 160 mijë euro gjobë me akuzën e trafikut të drogës. Ky vendim është dhënë nga Gjykata e Milanos, ndërsa një dënim me 24 vjet burg i është dhënë atij nga Gjykata e Romës. Shpallja e tij në kërkim ndërkombëtar është bërë më herët, por ekzekutimi është realizuar pas më shumë se 10 vjetësh. Arrestimi i tij fill pas ngritjes së zërit të Medihut mund të mos jetë një rastësi.

Ndërkohë, ende nuk është arrestuar ndonjë mik i Metës...

E.Zaloshnja