Ilir Meta përgënjeshtron lajmin e botuar në Shekulli.com.al

Në një lajm të mëparshëm në Respublica.al, raportuam se sot Ilir Meta, në një veprimtari partiake në Durrës, ka thënë se duhet gjetur mënyra për të arritur një konsensus [me qëllim që vota të jetë e barabartë dhe të numërohet drejt] pavarësisht nga formula, sepse ka disa të tilla që janë propozuar nga parti të ndryshme politike.  Në të njëjtën kohë, Shekulli.com.al kishte një lajm me titull “LSI-ja nuk ka si kusht ndryshimin e Kodit Zgjedhor, ndryshe nga ‘të vegjlit’ e tjerë”, në të cilin thuhet shprehimisht kështu: “Kryetari i Lëvizjes Socialiste për Integrimi Ilir Meta nuk ka më si kusht ndryshimin e sistemit zgjedhor, pavarësisht se koalicioni me PD-në, e parashikonte atë si pikë të marrëveshjes. Tashmë, LSI përveçse nuk flet më për ndryshim të sistemit zgjedhor, nuk ka as si ‘kusht’ korrektimin e sistemit, ndryshe nga partitë e tjera të vogla. Kreu i saj Meta mjaftohet me kërkesën e barazisë së votës, që nënkupton ndryshimin e numrit të qarqeve.”

Midis këtyre dy raportimeve ka një diferencë të madhe – i yni nënkupton që LSI-ja kërkon çfarëdolloj ndryshimi të sistemit që garanton barazinë e votës, ndërsa i Shekullit.com.al nënkupton se LSI-ja tani kërkon vetëm ndryshimin e numrit të mandateve të qarqeve. Për të saktësuar se çfarë ka patuar parasysh Ilir Meta me fjalët që ka thënë në Durrës, e kontaktuam vetë atë dhe i bëmë këtë pyetje: “Me barazi të votës, keni parasysh barazimin e numrit të mandateve në zona zgjedhore, apo korrektimin kombetar?” Dhe Meta na u përgjigj se ka patur parasysh secilin prej këtyre dy varianteve, jo vetëm njërin. Pra, korrektimi kombëtar i “sistemit spanjoll”, përkundër raportimit të Shekulli.com.al, “mbetet në tavë” për LSI-në.

E.Zaloshnja