Detaje anektodike nga xhirimi i fimit ‘Udha e shkronjave’

Në një intervistë për Gazetën Shqiptare, regjizori Vladimir Prifti rrëfen disa detaje anektodike që kanë lidhje me procesin e xhirimit të filmit ‘Udha e Shkronjave’ që, siç dihet, është ngritur mbi një tregim të Dhimitër Shuteriqit me titull ‘Buka dhe thika’ dhe vërtitet rreth jetës së personazhit historik Dhaskal Todri.

“Rolin e Ndrios ia kisha propozuar Kadri Roshit”, thotë Prifti, “por pikërisht atë ditë që do fillonim xhirimet, ai nuk u paraqit. Pse? Nuk donte të luantedhe një rol tjetër negativ, pasi më pas nuk e përballonte dot presionin pas daljes së filmit. Nuk donte pra që njerëzit ta identifikonin në vijimësi me një personazh ‘të lig’.

Por detajet më interesante, kanë të bëjnë me xhirimet dhe presionin e censurës së regjimit:

1. Na thanë se pantallonat e Tunxhit ishin pak të ngushta e ngjanin si pantallona cowboys-ish. Na thanë të rixhironim çdo skenë me Tunxhin, por ngaqë ri-xhirimi ish punë e madhe i “shpëtuam pantallonat”.
2. Na thanë se Sanndri i kish flokët shumë të gjata në rol, por censorëve u është shpjeguar se rilindasit mbanin flokë të gjatë; pas kësaj u tërhoqën.
3. Na thanë  që mbiemrin Todri ta hiqnim, por insistuam me idenë se “filmi përveçse ishte artistik, ishte dhe historik”.
4. Na pyetën se “pse shkronjat duhet të vijnë nga perëndimi, e jo nga lindja, me të cilën kemi marrëdhënie të mira?”.

Etj, etj, etj. Anektoda të një kohe absurde.

E.G.