Cili është Mugabe, sipas Metës?

Disa gazeta e kishin cituar Ilir Metën që foli dje në një takim grash lsi-ste, duke ia interpretuar një mesazh anektodik në mënyrë disi të shpenguar. Është fjala për anektodën lidhur me Mugaben e regjimin e tij. Meta saktësisht tha: ”Në Vjenë, në një aktivitet ndërkombëtar, takova Morgan Tsvangirai-n, i cili është sot kryeministri i  Zimbabvesë dhe që ka qenë për vite të tëra udhëheqës i Lëvizjes për Ndryshim në një nga regjimet më çnjerëzore të Afrikës dhe gjithë botës. [Ndihmësi im] më tha: ‘Po ky si ulet me Mugaben çdo javë dhe diskutojnë për të ardhmen e  Zimbabvesë, duke pasur parasysh se sa shumë njerëz janë vrarë, sesa shumë njerëz ka humbur Tsvangirai gjatë viteve të rënda të opozitës, kur humbi edhe bashkëshorten, nënën e gjashtë fëmijëve?’.

[Dhe unë iu përgjigja]: ‘Natyrisht që Tsvangirai ulet me Mugaben, i cili ende vazhdon të jetë presidenti i  Zimbabvesë, jo sepse ka harruar të kaluarën, jo sepse ka harruar të vrarët, jo sepse ka harruar manipulimin e zgjedhjeve, por sepse ai e di shumë se në rast se nuk do të ulen, nuk do të bisedojnë e nuk do të bashkëpunojnë, akoma më shumë njerëz do të vriten në Zimbabve’”.

Kush është Mugabe e kush Tsvangirai në këtë mes? Sipas shumë gazetave, me Mugaben Meta ka parasysh Berishën. Është kështu? Këtë vetëm Meta mund ta dijë.

E.G.