“Trofta” Bossi, asnjëherë në Shqipëri. Ish-Rektori: Se mbaj mend si student

Të mbarosh fakultetin dhe të mos të të mbajë mend profesori që të ka dhënë mësim? Ndodh nganjëherë në vendin tonë, por nganjëherë ama. Kështu i ka ndodhur edhe Enzo Bossit tek është diplomuar në vitin 2010 në Universitetin Kristal. “Shqiptarja.com” i referohet sot Marenglen Spiros, ish-Rektorit të këtij Universiteti tek thotë se nuk mban mend të ketë pasur një student të tillë si “trofta Bossi”. Për më tepër që diploma e dhënë mban firmën e Profesor Spiros.

Dyshimeve që Bossi e ka marrë diplomën pa ardhur asnjëherë në Shqipëri, i shtohet edhe deklarimi i Ambasadës Italiane. Gazeta citon burime nga kjo ambasadë, të cilët theksojnë se nuk janë vënë në dijeni për një vizitë të Bossit në Shqipëri. “Aq më tepër kur në mars 2010 ai u zgjodh si anëtar i krahinës së Lombardisë, duke u bërë një politikan zyrtar dhe sipas protokollit, në rast ai kishte ardhur në Shqipëri, ambasada italiane në Tiranë duhej ta dinte patjetër”, - shkruan gazeta.

S.E.