Në 25 vjet ndryshimi është nga "piso" apo "indietro" te "zuruck". Shëtitjet e Hoffman në dogana mbaruan. BBC: Opsion, rikthimi i regjimit të vizave me Shqipërinë

Nga 25 vite më parë ka ndryshuar vetëm fjala. Shqiptarëve nuk u thuhet më "piso" apo "indietro" por "zuruck", që do të thotë mbrapa kthehu ne gjermanisht. Riatdhesimi i 70 azikërkuesve shqiptarë mesditën e së mërkurës shënon rikthimin e Shqipërisë në vitet '90 kur shqiptarët deportoheshin si të padëshiruar nga vendet e Bashkimit Europian. Pas paralajmërimeve shëtitëse të ambasadorit Hofman që nuk la pikë doganore pa vizituar, Gjermania ndez motorrët e avionëve që do të kthejnë në Shqipëri emigrantët e paligjshëm. Një mesazh ky edhe për qeverinë shqiptare që e sheh fenomenin si produkt të grupeve kriminale, duke mos i njohur vetes asnjë përgjegjësi për largimin masiv të njerëzve të saj edhe pas 25 viteve tranzicion. Gjermanët këtë radhë e kanë seriozisht dhe pikturat e kryeministrisë pavarëisht se e ngohën klimën e marrëdhënieve duket se nuk e bindën kancelaren Merkel të mbajë në prehër shqiptarët energjikë që siç thotë Edi Rama kanë nevojë për Europën aq sa Europa ka nevojë për ta.
Azilkërkuesit nga Shqipëria, Siria apo vende të tjera të Ballkanit janë lajm i mediave kryesore në Europë. Rrjeti televiziv britanik BBC bën të ditur se politika gjermane është përfshirë nga debate të shumta për mënyrën se si duhet përballuar dhe frenuar fluksi i azilkërkuesve. BBC citon një zëdhënës të Agjencisë gjermane për Migracionin dhe Refugjatët, të ketë thënë se rivendosja e regjimit të vizave do t’a frenonte fluksin nga vendet e Ballkanit. Megjithatë, alternativa që po qarkullon më shumë mes klasës politike në Gjermani është shpallja si vende të sigurta për Shqipërinë, Kosovën dhe Malin e Zi.
Ky klasifikim ua bën më të lehtë autoriteteve gjermane të kthejnë mbrapa azilkërkuesit nga këto vende, pasi ata do t’a kenë më të vështirë të vërtetojnë se janë viktima të persekutimit politik, fetar apo etnik në vendet e tyre të origjinës. Ky hap u ndërmor në dhjetor të vitit të kaluar për Bosnia-Herzegovinën, Maqedoninë e Serbinë. Sipas Agjencisë gjermane për Migracionin dhe Refugjatët, numri i azilkërkuesve nga këto vende, aktualisht ka një rritje me 12%. Ndërsa nga Shqipëria, Kosova dhe Mali i Zi, që ende nuk janë përfshirë në këtë listë, azilkërkuesit kanë pësuar një rritje me 500%.
l.mitro