Gazeta "Shekulli" denoncon udhëtimin e deputetes Ledi Shamku dhe familjes së saj në ishullin e Sazanit me anijen ushtarake “Oriku”

Me një shkrim  të pasqyruar edhe në ballinën e saj gazeta  “Shekulli” denoncon udhëtimin e deputetes Ledi Shamku dhe familjes së daj drejt ishullit të Sazanit me anijen ushtarake “Oriku”, duke përcjellë edhe reagimet e publikut, pasi si deputetja Shamku ashtu dhe bashkëshorti i saj Artan Shkreli kishin ndarë emocione dhe foto në facebook nga ky udhëtim.

Ja se çfarë shkruan Shekulli: Artan Shkreli shkroi në në orën 12.00: “Anija ushtarake "Oriku" lë brigjet e Vlorës për në Sazan. Emocion kur kujton sa i huaj dhe i joni njëkohësisht ka qenë ky ishull”. Ka mjaftuar ky status, shoqëruar me foton e anijes ushtarake si dhe fotot që më pas do të postonte bashkëshortja, deputetja e PS-së Ledi Shamku, një orë më pas shoqëruar me statuse të tipit: “Shqipëria, bukuria e fjetur! Faleminderit Zot! Je kaq i bukur o vendthi im! Kaq i bukur!”, që përdoruesit e rrjetit social Facebook t’i akuzonin se kanë përdorur pushtetin për të vënë në dispozicion të pushimeve të tyre private një anije të Flotës Luftarake Detare të Shqipërisë.

Me një një ekuipazh prej 15 specialistësh dhe në bashkëpunim me Qendrën Operacionale Detare Ndërinstitucionale anija e parë shqiptare është në funksion të Rojes Bregdetare për të përmbushur misionet e sigurisë së ujrave territoriale, operacionet e kërkim shpëtimit, monitorimit të rajonit dhe goditjen e veprimtarive të paligjshme nëpërmjet rrugeve detare. Pikërisht për shkak të këtij funksioni, komentuesit online kanë akuzuar deputeten dhe bashkëshortin e saj arkitekt, se e kanë përdorur atë për pushimet e tyre verore, në vend që të merrnin anijet që janë të dedikuara për turizmin. I pyetur nga gazeta ‘Shekulli”, Artan Shkreli tha se ishte për të parapërgatitur punët për hapjen e ishullit të Sazanit për civilët: “Kam qenë me strukturat e Agjensisë Kombëtare të Bregdetit. Bashkë me z. Auron Tare, veç tjerash, në bashkëpunim me Rojen Bregdetare, kemi përcaktuar dhe itineraret sipas Planit të Menaxhimit të ishullit që do miratohet së shpejti për t’u hapur për civilët”-deklaroi Shkreli. Majin e shkuar, kryeministri Rama bëri të ditur, përmes një mesazhi në rrjetin social “Facebbok” se ishulli do të hapej këtë verë për turistët.

http://www.shekulli.com.al/p.php?id=290207

l.m