Më në fund, respublica e re është online

Miq të website-it respublica.al,

Ky është ristartimi i një nisme gazetareske, që në harkun e muajve të fundit po jepte shpirt. Ideja e fillimit është pasuruar, gjë që duket edhe nga një kqyrje e shkujdesur e faqes. Një ide më e pasuruar nuk do të thotë domosdoshmërisht një ide më e mirë, por ne po startojmë me këtë besim. Faqja e rikompozuar është në fillimet e veta; mbi të po punohet akoma; ky fakt nuk të jep një ide më të plotë mbi projektin, por nga ana tjetër të jep avantazhin të thithësh mendime e sugjerime (jeni të lutur t’i bëni, nëse keni). Shpresojmë që në krye të një muaji, gjërat të jenë vendosur në vendin e vet.

Kjo është ana stilistike e gjësë, megjithatë. Më shumë rëndësi ka përmbajtja, dhe në këtë plan ne kemi menduar t’i japim site-it pamjen e përmbatjen e një gazete. Nuk do të ketë vetëm opinione, por edhe lajme e rubrika të tjera të natyrës informative. Për këtë kërkojmë dhe ndihmën tuaj. Një nga ndryshimet më esenciale në botën e sotme të informacionit ka të bëjë me faktin, që ka ikur njëherë e mirë koha e reporterit klasik, dmth e gazetarit që e kërkon lajmin për t’ua dhënë lexuesve. Jo, sot është koha kur çdo lexues mund të jetë një reporter. Mjetet e shumta që mundësojnë komunikimin në kohë reale midis qosheve më të largëta të globit e bëjnë të pakuptimtë situatën, në të cilën një ngjarje apo një lajm rri në pritje të gazetarit. Sot, kushdo që ndodhet pranë lajmit, mund ta shohë atë, ta fotografojë, ta filmojë e në fund ta raportojë pranë një gazete, pranë një agjencie të informacionit, në site të ndyshme online apo në blog-un e vet personal. Në këtë kuptim, ne kërkojmë nga ju  që, sa herë të keni lajme për të dhënë, t’na i përcillni në adresat tona elektronike. Nëse formulimi i lajmit nga ana juaj do jetë korrekt, ne do t’ua lëmë të paprekur. Poshtë mund t’ju vëmë emrin, nëse doni që t’ju vihet emri, por edhe mund t’ju ruajmë anonimatin, nëse doni që të mos merret vesh burimi i lajmit.

Çfarë mund të na jepni konkretisht? Çdo gjë, që ju mendoni se do ishte mirë ta dinin dhe të tjerët në Shqipëri. Ju mund të jeni në Portland të Oregonit, në Lesotho të Afrikës së Jugut, në Xhakarta apo në Riad, dhe kudo mund të ndodhin gjëra, për të cilat në Shqipëri mund të ketë një interes gjenuin. Dhe kuptohet, kryesisht jemi të interesuar për lajme që kanë të bëjnë me Shqipërinë e me shqiptarët, të cilat mund të mos kenë asnjë interes për vendin ku ndodhin. Shqiptarët janë shpërndarë në të gjithë botën, dhe kudo ku janë, ata mund të jenë pjesë e një ngjarjeje që përbën lajm për ne të këtushmit.

Do të mirëprisnim, gjithashtu, artikuj e shkrime tuajat, apo përkthime të artikujve të publikuara në gazeta të rëndësishme të botës e të nënshkruara nga emra të rëndësishëm të gazetarisë, apo kulturës. Veçse nuk duhet t’u dalë nga mendja që, së pari do jetë dikush që do zgjedhë cilat shkrime duhen publikuar e cilat jo (mbi bazën e vlerësimit të shkrimit në pikëpamje të formës e të përmbajtjes), dhe së dyti ky website ngrihet mbi frymëzime liberal-progresiste. Ç’do të thotë kjo? Kjo nuk do të thotë se nuk do të kemi hapje doktrinore; jo, as që bëhet fjalë për këtë, pasi një hapje e tillë bën të mundur ballafaqimin e ideve. Kjo do të thotë që jemi të prirur të promovojmë politika e vlera liberal-progresiste; më konkretisht, kjo do të thotë se nuk do ta kemi të lehtë të publikojmë, fjala vjen, një shkrim në favor të regjimit të Llukashenkos në Bjellorusi.

Në fund, do të mirëprisnim të gjitha komentet e mundshme mbi materialet e publikuara në këtë website. Jemi ende të lëkundur, kur vjen puna tek qëndrimi ndaj komenteve, që nuk synojnë idetë, por kanë target autorin, mbi të cilin derdhen fyerje, të shara e shpifje. Por është e qartë se, edhe në rastin kur do t’i publikonim (në respekt të lexuesit tonë, s’ka gjë se është i shthurur), prapëseprapë nuk do t’i mirëprisnim (në respekt të lexuesve të tjerë e të bashkëpunëtorëve tanë).

Shkurt, ideja e suksesit të kësaj nisme ngrihet edhe mbi kontributin tuaj të pritshëm. Faleminderit.