"Myftiu" politik i Tiranës dhe tufa e PD-istëve që nderuan Erdoganin

Erion Veliaj, mund të quhet pa frikë edhe“Myftiu politik” i Tiranës. Të paktën nisur nga komenti për  memorialin e vendosur në parkun e Liqenit Artificial të Tiranës në nderim të ushtarakëve turq që mbetën të vrarë në grushtin e shtetit në Turqi.

Ndonëse u mundua të heqë çdo përgjegjësi nga vetja duke thënë se personalisht nuk ishte i pranishëm në ceremoninë që u ndoq nga mëkëmbësi i tij Mazniku, Veliaj iu referua një lloj konsensusi që i bëri bashkë drejtuesit e bashkisë dhe një tufë PD-istësh të vetëquajtur shoqëri civile

“Në atë territor ka mbi 50 pika, ku janë kujtuar raste të ndryshme, dhe secili ka mundësi të respektohet. Unë do të thosha t’i lëmë të vdekurit të qetë dhe kush do që t’i respektojë me një qiri, me një lule apo me një lutje, t’i lëmë gjithashtu të qetë. Tirana zemërmadhe ka vend për të gjithë. Ndaj, për të gjithë ata që vapa e gushtit i kapi në ngut për fletërrufe, s’ka ndodhur asnjë hata, le më tradhti apo ndonjë shkelje e kësaj natyre”- shtoi Veliaj.

Komenti i Veliajt në fakt ishte fyes edhe për emrat e të ashtuquajturve dëshmorë të demokracisë së udhëhequr nga Erdogan. Kryebashkiaku i Tiranës la të kuptohet se ndërtimi i memorialit hoqi ferrat nga një pjesë e parkut.

 “Nuk i prish punë askujt. Më thonë është në cepin e Liqenit, ku shumica prej atyre që ankohen as iu ka rënë në mendje kur ishte mbuluar me ferra dhe kur digjej plastikë dhe ku zaptohej si territor.  Tek Liqeni dhe në të gjithë Tiranën ka vend për të gjithë”- nënvizoi Veliaj.