Një lajthitje e Rexhep Qoses
Enver Hoxha është një prej figurave me përkushtim më të madh atdhetar në historinë shqiptare! Kështu ka deklaruar para pak ditësh Rexhep Qosja, ndërsa i kundërvihej, jo pa të drejtë, demagogjisë “patriotike” të Sali Berishës. Duhet thënë, që në krye të herës, është përqasja tmerrësisht e gabuar. Është e vërtetë se Sali Berisha dhe klani i tij po thonë e shkruajnë të bëra e të pabëra e po hedhin, sikundër shprehet edhe Qosja, “gurë e drunj mbi Enver Hoxhën”. Por këtë e bëjnë që të fshehin thelbin e përbashkët që ata kanë me ish-diktatorin, prirjen për shtypjen (mundësisht varrosjen) e lirisë qytetare të shqiptarëve. Prandaj t’i kundërvihesh berishistëve duke deklaruar se Enveri ishte ndryshe nga ata, nuk bën gjë tjetër, edhe pse qartazi pa dashje, veçse i shërben synimit të tyre për t’u shitur si ndryshe nga ish-diktatori komunist. Përveç kësaj, nëse Enver Hoxha është një prej figurave me përkushtim më të madh atdhetar, mos vallë shqiptarët bënë keq që e përmbysën? A qe përmbysja e monumenteve të diktatorit, e bashkë me to edhe të regjimit komunist, në dobi apo në dëm të Atdheut? Nëse po, si mund të jetë një akt atdhetar përmbysja e “një prej figurave me përkushtimin më të madh atdhetar në histori”?!
***
Na duket se gabimi apo lajthitja e Rexhep Qoses vjen nga fakti që në mendësinë dominuese shqiptare nuk ka hedhur rrënjë të forta koncepti i lirisë qytetare si një dukuri që, më së shumti, zhvillohet ndarazi nga ajo që quhet liri kombëtare apo pavarësi. Sipas kësaj mendësie kush lufton apo punon për pavarësimin e trojeve kombëtare nga pushtuesi i huaj, për shmangien e copëtimit apo ribashkimin e tyre, është një patriot, pavarësisht se cili është roli i tij në një çështje tjetër edhe më të rëndësishme për Atdheun, për zhvillimin dhe lumturimin e njerëzve të tij, në çështjen e lirisë qytetare. Kjo mendësi e gjymtë ka mundësuar që figura despotike të marrin mbi vete famën e patriotit, të çlirimtarit të kombit dhe nën vellon e kësaj fame, të shtypin dhe sundojnë në mënyrat nga më të egrat bashkatdhetarët e vet duke mbjellë skllavëri në gjirin e kombit. Shembujt nga më të freskëtit janë Ahmet Zogu dhe Enver Hoxha që vazhdojnë të përfliten si patriotë, ky i fundit, edhe nga një figurë e shquar e mendimit shqiptar si Rexhep Qosja. Kontradikta logjike është ulëritëse dhe e papranueshme: Si mund të jetë patriot një diktator? Si mund të jetë patriot një despot që vret, burgos, pushkaton bashkatdhetarë, kundërshtarë politikë vetëm për të përjetësuar sundimin e tij? Dhe nëse Enver Hoxha na paska qenë një patriot kaq i madh, mos vallë shqiptarët kanë bërë gabim që ia përmbysën bustin? Mos vallë ka ardhur koha që t’ia ringrenë?
***
Është fakt, Enver Hoxha ka udhëhequr luftën për çlirimin e Shqipërisë nga pushtuesit nazifashistë. A e bën kjo atë një patriot? Jo, sepse më pas ai nuk luftoi për lirinë, lirinë qytetare. Vepra patriotike e çlirimit u pasua nga një tjetër thellësisht antipatriotike, ajo e skllavërimit të shqiptarëve me mjetet e terrorit diktatorial për 45 vjet rresht. Të mos bësh dot këtë bilanc, do të thotë të mos mësosh nga pësimet e historisë dhe të jesh i dënuar ta pësosh përsëri. Edhe figura të tjera më të mëdha të historisë botërore kanë luftuar me tërbim për atë që ata e quanin interesin kombëtar. Një i tillë ka qenë edhe Adolf Hilteri, që në emër të nacionalizmit gjerman, shtypi lirinë e gjermanëve dhe më pas, i përdori si mish për top, duke i vënë zjarrin botës dhe duke shkatërruar më në fund edhe Gjermaninë. Duhet të jesh naziskin ta quash Hitlerin patriot. Dhe nuk është e nevojshme të çosh vendin në luftë shkatërrimtare për të qenë një antipatriot. Mjafton të shkatërrosh lirinë apo shansin e lirisë qytetare, që vendi të mbetet i prapambetur dhe larg proceseve perëndimorëzuese që sjellin zhvillim e lumturi për njerëzit. Këtë e bëjnë të gjithë politikanët me prirje sunduese dhe prandaj nuk janë patriotë, sepse duke vrarë lirinë qytetare, vrasin frymën e zhvillimit, një forcë që është shumë më e rëndësishme se çdo zhvillim material. Dhe pikërisht ky është mëkati që Sali Berisha dhe pasuesit e tij po bëjnë kundër Shqipërisë. Thelbi i aksioneve të tyre është i njëjtë me atë të Enver Hoxhës, shtypja e lirisë qytetare. Por në kushte të reja. Jo ato të Luftës së Ftohtë kur diktaturat ishin në modë në gjysmën e botës, por në kohën kur demokracia është në modë.
***
Por cili është modeli i patriotit të vërtetë? Është ai i politikanit që luftën për pavarësinë apo çlirimin e kombit nuk e ndan nga ajo për lirinë qytetare. I tillë qe Xhorxh Uashingtoni, që pasi kontribuoi në çlirimin e SHBA, ju dedikua qeverisjes me anë të lirisë dhe jo me anë të sundimit. Dhe këtë e arriti duke mos abuzuar me famën e çlirimtarit për të zgjeruar dhe absolutizuar pushtetin e tij. Madje pikërisht sepse qe i ndërgjegjshëm për rrezikun që sjell për lirinë e qytetarëve pushteti i pakufizuar i një njeriu, refuzoi të zgjidhej President për një mandat të tretë. Sepse liria kërkon që pushteti të kufizohet edhe në kohë. Doni t’i zbuloni diktatorët e fshehur sa pa u betonuar në pushtet? Shikoni sesa të gatshëm janë ta lënë pushtetin kur ju mbaron mandati. Kush kapet me thonj pas pushtetit, pasi ka qeverisur disa herë, është i rrezikshëm për lirinë, pra edhe për Atdheun dhe duhet larguar. Prandaj kush është patriot nuk e voton më.
***
Kamuflimi i autokratëve me patriotizëm është i lehtë në Shqipëri edhe pse ekziston në masë një mendësi që e percepton tradhtinë kombëtare vetëm te shitja e trojeve, falja e ujërave detare deri edhe te hapja e dyerve për importimin e plehrave nga bota. Këto janë dukuri që me të drejtë klasifikohen si tradhti e interesave të vendit. Por, ndërkaq, nuk ka një ndjeshmëri po kaq të madhe patriotike edhe për akte që shpien nga asgjësimi i lirisë qytetare, që është krimi më i madh që mund t’i bëhet një kombi. Kjo vjen edhe ngaqë asgjësimi i lirisë, bëhet duke thirrur për lirinë e demokracinë dhe në forma më të sofistikuara, jo lehtësisht të perceptueshme nga masa. Sikundër është amendimi i një Kushtetute në atë farë feje që i shërben zgjerimit dhe jo asaj që është themelore për lirinë e qytetarëve, kufizimit të pushtetit të kryeministrit. Këto gjëra, politikanët autokratë kanë tendencë t’i bëjnë sa më fshehtazi. Jo rastësisht amendimin e Kushtetutës, Berisha (i mbështetur verbërisht edhe nga Edi Rama), nxitoi ta bëjë pa konsultime të gjera me shoqërinë civile dhe qytetarët. Sepse nuk donte që shqiptarët të kuptonin se ai po hapte “me ligj” varrin e lirisë së tyre, nuk donte të kuptonin të vërtetën. Dhe ia arriti. Edhe nga mendësia ekzistuese sunduese që nuk e vret fort për lirinë qytetare, si dhe për themelet e saj kushtetuese e ligjore. Në të kundërtën, deklarimet dinake dhe hipokrite për bashkimin kombëtar, Berisha i bëri nga majat e tribunave të 100-vjetorit të Pavarësisë. Sepse donte që shqiptarët ta përthithnin sa më në shumicë gënjeshtrën, demagogjinë patriotike që po ju ekspozonte.
***
Nëse njerëzit e duan lirinë vetëm për të mirat materiale që sjell, atëherë ata do ta braktisin atë në ditë të vështirë – thotë Tukëvili. Ka në këtë pohim diçka të ngjashme me imperativin kategorik të Kantit. Lirinë duhet ta duash për hir të të qenurit i lirë. Të mirën duhet ta bësh, jo thjesht për përfitim personal, por si devocion ndaj detyrës. Ky lloj morali qytetar nuk ka qenë i përhapur në mjedisin shqiptar. Ende nuk është. Prandaj pengesë për të kuptuar thelbin antipatriotik të veprës së Enver Hoxhës janë bërë edhe faktet e zhvillimit material që u evidentuan gjatë viteve të sundimit të tij. Ndonëse tepër inferiore krahasuar me nivelet e zhvillimit material në vende europiane, këto fakte kontrastonin fort me sfondin e mjerimit që Shqipëria trashëgonte nga qeverisjet e mëparshme, përfshi atë të Zogut. Gjë që i dha mjaft vite kohë regjimit që të dukej se po i bënte mirë “popullit” në një kohë që po i bënte keq, po i vriste lirinë. Zhvillimi material, i gërshetuar edhe me izolimin që pamundësonte krahasimin me vendet e tjera, i bëri shumë shqiptarë të ndiheshin më mirë krahasuar me mjerimin e dikurshëm migjenian që regjimi e propagandonte intensivisht, duke e përdorur si sfondin e errët ku shkëlqenin arritjet e socializmit. Gjëra të papara më parë, por normale në çdo vend me pak zhvillim si hekurudhat, hidrocentralet, drita elektrike, shtimi i urbanizmit, zhvillimi i industrial i pleksur me manipulimin mendor dhe kufizimin e lirisë së informacionit, i dhanë regjimit disa dekada në dispozicion që të kamuflohej si patriotik. Dhe arritjet materiale, kur nuk ecin paralel me lirinë, ushqejnë skllavërinë. Madje edhe arritjet në superstrukturë. Mund ta zhdukësh analfabetizmin por, nëse censuron literaturën, nëse kufizon lirinë e shprehjes, të lexuarit shërben vetëm për të përçuar ideologjinë e diktatorit në kokat e njerëzve. Aftësia për vetëmendim mpihet. Kështu vazhduan mbi katër dekada derisa erdhi fundi i pashmangshëm për çdo sistem pa liri, vetëshembja. Por ndërkohë, diktatori Enver Hoxha kish vdekur i qarë nga “populli” që nuk e kuptonte se ai ia kish hedhur duke mbretëruar me devizën: Pas meje kiameti. Dhe kiameti po vazhdon sepse pas tij erdhi një tjetër “patriot” që prej 23 vjetësh po bën politikë e qeveris me po të njëjtën devizë: pas meje kiameti! Dhe pikërisht sepse kiameti po vazhdon, jo pak shqiptarë i drejtohen për shpëtim Enverit në fakt, babait të kiametit. Një dumbabizëm në kurthin e të cilit ka rënë, mjerisht, edhe Rexhep Qosja. Dhe në çdo panegjerizëm për ish-diktatorin, nuk mund të mos zbulosh prirjen e arratisjes nga ky kiamet pa fund por mjerisht, edhe nga ideja apo projekti i lirisë.
SHQIP
Comments
Shqiptaret nuk permbysen
<p>Shqiptaret nuk permbysen Enver Hoxhen, por thjesht u perdoren nga pashallaret e kuq qe perdoren me zgjuarsi figuren e tij si pelhure te kuqe per te shpene turmen aty ku deshten ato.</p>
Nuk mund te kete imperativ
<p>Nuk mund te kete imperativ kategorik, çdo ideal eshte instrumental, kjo eshte provuar me kohe nga filozofet pas Kantit.</p>
Analiza duket qe pasqyron
<p>Analiza duket qe pasqyron lodhjen e madhe te autorit nga mungesa e gjate e dritave.</p><p>Skenderbeu, Ali Pashai, Ismail Qemali, Zogu, Enveri dhe Berisha jane produkte te kohes se tyre me te mirat dhe te keqijat e tyre. Sigurisht qe Enveri nuk ishte dhe nuk mund te ishte nje Xhorxh Uashington ne kushtet e Shqiperise, keshtu qe cdo vlersim i figurave te siperpermendura ka vlere e merr kuptim se pari duke u krahasuar mes tyre dhe se dyti duke i vendosur ne kontekstin e kohes kur jetuan dhe te mundesive qe ofronte mjedisi ku ata vepruan. Keto gjera i di padyshim dhe Andrea, por sic e thashe do ta kete patur nga nderprerja e dritave.</p>
Qe ne fillim z. Andrea u them
<p>Qe ne fillim z. Andrea u them se jeni i gabuar thellesisht ne gjykimin e disa koncepteve mbi vleresimet e R. Qosjes dhe sidomos per modelin e patrioti ne pergjithesi. Natyrisht qe ka dy gjera, ose nuk njeh Enver Hoxhen fare ose flet qellimisht ato gjera qe i vijne per shtat trendit te pergjithshem te demokracise kapitaliste e cila kullon gjak ziveresh dhe shkrepetima zhavieresh. Rregjimi i Enver Hoxhes nuk perndoqi popullin por e mbrojti popullin pikerisht nga keta pjella te shemtuar te ndergjegjes se erret shoqerore dhe pjella te rritura me indiferencen tende prej intelektuali te vetkenaqur. Keto pjella te shemtuara kane 20 e me shume vite qe vertetojne qendrimin parimor te Hoxhes ndaj atyre qe donin te shisnin detin e Shqiperise qe ne kohen e tij. Eshte e natyrshme qe gjerat nuk precipitojne kollaj ne kete furtune fashistoide por shpresa se ka njerez qe e thone te verteten me guxim nuk mund te vdese sepse ja R. Qosja eshte i pari qe flet me guximin e vet qytetar per ato gjera qe shumkush nuk guxon ti shkoje neper mend. E perseris se po te hapim debate mbi jeten e popullit shqiptar gjate 50 viteve te socializmit, e verteta do ta kishte rrugen me te lehte dhe fjalet per Qosjen do te ishin me te matura, (Une e kam fjalen per debate te qeta dhe jo per te ashtuquajtura debate televizive qe s'jane gje tjeter ne shumicen derrmuese te rasteve, vec kacafytje te marresh te futur ne korraca partiake apo pavarsirash te rreme dhe luftojne me mjete te padenja mesjetare (edhe me kova m....)</p>
Andrea, I lumtur mund të jesh
<p>Andrea, <br />I lumtur mund të jesh edhe duke sjellë oriz nga Kina apo banane nga Afrika</p>
Zoti Stefani është patriot
<p>Zoti Stefani është patriot apo jo këtë besoj dohet ta thonë historianët duke parë të gjitha dokumentat dhe pastaj të peshojnë nga anonë më shumë nga tradhëtarë apo nga patriot dhe të vendoset dhe sa për zotin Qose qëllojë që e pashë interëvistën dhe nuk pashë të thoshte se Enveri është patriot por tha ato që janë bërë si të mirat dhe të këqiat dhe sa për thonjzat që gjoja populli e qau nuk keni të drejtë se vërtetë e qanë dhe na erdhi keqë që ndolli për veçë atyre që prisnin me padurim për vdekjen dhe përbysjen e pushtetit popullor prandaj mbase ju i takoni këtyre që priste me pa durim për përbysjen por të vendosni shënjën e = ndërmjet Zogut,Enverit dhe Berishës nuk është e drejtë kur e bëni ju njeriu i penës që jeni çfarë mund të thonë të tjerët</p>
E diskutueshme deklarata e
<p>E diskutueshme deklarata e profesor Qoses si dhe replika e Andrea Stefanit. Raportet ndermjet lirise se individit me ate te Atdheut, lirise personale me ate shoqerore, privates dhe publikes, zhvillimit dhe perparimit me hapa te shpejta te shtetit dhe me hapa breshke te nivelit te jeteses se njerezve, - jane disa nga kundershtite qe u verejten ne kohen e sundimit te Shqiperise nga Enver Hoxha. Liria eshte diçka e domosdoshme, por duhet ditur se per çfare lirie behet fjale. Siç dihet ujku dhe qengji kane kendveshtrime te ndryshme per lirine. Njekohesisht edhe liria e teperuar çon shpeshhere ne anarshi, qe ndonjehere eshte edhe me e keqe se diktatura. Sot ne Shqiperi ka liri. Ka liri per te vjedhur, si psh pushtetaret qe kane bere miliona me « djersen e ballit », ka liri per te share dhe peshtyre psh edhe mbi ata qe sakrifikuan per kete vend. Ka liri per te perdhosur Skenderbeun dhe lavderuar Ballaban Pashen etj. etj.Ka liri per te kenduar edhe me breke dhe pa breke. Ne rast se ne kohen e diktatures Sigurimi famekeq te internonte me gjithe familje per nje fjale goje, ne kete te ashtuquajtur demokraci mafia nuk eshte me e dhembshur. Te te marrin vajzen nga shkolla per te ta çuar prostitute nuk me duket ndonje ndryshim per mire. Berisha psh i le njerezit te bejne ç’te duan ne emer te lirise me kusht qe edhe ai dhe familja e tij te bejne ç’te duan ne kete vend… Me nje fjale edhe liria e pakufishme dhe e pakontrolluar eshte po aq e demshme sa edhe diktatura. Prandaj duhen lene menjane fetishizimet dhe te vihen ne ballance te mirat dhe te keqijat e nje sistemi. Vetem liria nuk mjafton. Demokraci do te thote diktature e ligjit, - ka thene Putin. Kalimi nga diktatura ne anarshi, nga nje shtet tejet I kontrolluar ne nje rrumpalle shteti – nuk me duket ndonje ecje perpara. Kam mendimin se ne shqiptaret nuk kemi ditur deri me sot te ndertojme nje shtet te ekuilibruar, prandaj kemi rreshkitur nga diktatura ne anarshi dhe anasjelltas. Dhe nga nje brume i tille lindin vetem Envere dhe Salinj.</p>
jane shume te veshtira si
<p>jane shume te veshtira si pyetje... dhe nuk kane pergjigje bardh e zi</p><p>cilet jane patriotet e vertete?</p><p>a mund te matet e shkuara me metrin e te tashmes? </p><p>gjuha nuk ka percaktim per gjithe fenomenet...</p><p>30% patriot + 70% hajdut =?</p><p>50% patriot +50% tiran=?</p><p>besoj na nevojiten pyetje konstruktive, qe te zhvillojme frymen kritike te gjithanshme te problemeve, jo thjesht kush ishte personazh pozitiv dhe negativ... por cfare mesojme nga historia, cilat jane rreziqet, si mund te parandalohen, si mund te rregullohen gabimet, etj. etj. cfare mund te bejme ne te tashmen, dhe sidomos te fokusohemi tek brezi i ri! mjaft me me debatet per enver hoxhen e sali berishen... e pabesueshme sa energji mendore, krijuese dhe debatuese eshte harxhuar vetem per keta te dy!</p>
Nje lajthitje fatkeqe e
<p>Nje lajthitje fatkeqe e Andrea Stefanit ose nje tentative e tij per tu bere protagonisti i vetem, kundershtar, perball guximit madhor qytetar shqiptar te Rexhep Qoses. Te matesh me Qopsen duhet ta kesh steken shume te larte zoti Andrea. Ti je nje gazetar kurajoz dhe shkruan bukur, dhe me shqetesim bashkekohor. Keshtu vazhdo se respekti-historia te vjen mbrapa me merite ne llogoren qe i ke taksur vetes dhe qe eshte e respektuar. Lere Qosen rehat ne bindjet e tija qytetarish te lakuara. Dhe. Nese Qosja vetdijshem po merret me Enver Hoxhen kjo eshte nje ndihmese nacionaliste, kuptohet jo nacionalizem-banal, pasi ne ketu ne Shqiperi, me turp e them, nuk e kemi hapsiren e duhur te lirise dhe te emancipimit europian, te nevojshme keto, per te debatuar njerzishem per historine e Enver Hoxhes dhe te Shqiperise per 50 vite - paprere. Se fundi, une e shoh procesin e gjellerimit te figures se Zogut dhe te gjallerimit te figures se Enver Hoxhes si nje te mire kombetare, dhe ne konkurence midis tyre, per prurjet ne dobi te mbijeteses se kombit shqiptar. Konkurenca do te beje te mundur edhe shperfaqjen e te mirave dhe demeve te secilit prej tyre, do te beje te mundur edhe rendin e sicilit prej tyre ne tabelen e klasifikimit te personaliteteve qe i kane kushtuar tere jeten e tyre, e perseris, mbijeteses se kombit shqiptar.</p><p>Gje te cilen nuk po e ben aspak klasa politike ne fuqi -ne Shqiperi. Andreas - Miqesisht.</p>
zoti Stefani, koha ka nje
<p>zoti Stefani, koha ka nje ndikim te madh te ti, shkrimet e tua sa vjen e behen me bajate...</p>
Mund te me thote njeri, nqs
<p>Mund te me thote njeri, nqs ne histori, perkushtimi atdhetar paska nenkuptuar po ashtu dhe perkushtimin, deshiren dhe njohurite per te ngritur nje shtet demokratik dhe nje ekonomi te lire tregu?!!</p><p>Keto koncepte, jane fillimisht te ndara nga pikepamje e analizes akademike, por qe ne kohe nderthuren dhe percaktojne njera- tjetren.</p><p>Pra vetem sot ne kohet moderne,pas disfates se komunizmit, ne e kemi kuptuar se qenia sado atdhetar ne disa momente te caktuara historike, kthehet kokeposhte dhe behet e kunderta e vet nqs shtyp lirine, nderton nje shtet diktatorial, se ne thelb shkon kunder interesave te atdheut. Vecse kur i analizojme keto veprime vecmas, pa i vene ne peshore se cila peshon me shume ne favor te atdheut, detyrohemi t'i quajme me emrin e tyre.</p><p>Me disa supozime, nuk mund te hidhet totalisht poshte si gafe ajo qe ka thene R.Qosja, sepse:</p><p>1- Nqs Enver Hoxha do te ndiqte nje vije kineze, pra te ruante monopolin politik, por te bente leshime ne ekonomi dora -dorez, nuk besoj se sot do te konsiderohej nje figure e urryer nga shqiptaret e sotem. Kjo rruge nuk do rrezikonte fare pushtetin e partise se tij dhe figuren e tij ne te ardhmen.</p><p>2- Nqs ne kulmin e luftes se ftohte, periudhe ne te cilen Shqiperia doli jashte blloqeve ushtarake, Evropa do te rreshqiste ne nje konflagracion mes lindjes dhe perendimit, perfshire dhe ndonje incident berthamor, sot Enver Hoxha do te kishte akoma monumentin ne qender te Tiranes.</p><p>3- Duke i ardhur per shtat konflikti i luftes se ftohte, ai po t'i bente koncesione ekonomike dhe ushtarake perendimit dhe SHBA, qe njekohesisht duhej t'i siguronte dhe pushtetin e vet, sot do kishim Ambasadorin amerikan duke i thurrur lavde Enver Hoxhes. Megjithese kjo nuk kishte gjasa te ngjante, duke u vene nen cadren mbrojtese te perendimit, ai do te perjetesonte pushtetin e seres se vet ne Shqiperi.</p><p>Ndaj e marre vecmas si fjali, eshte e papershatshme ajo qe ka thene R.Qosja, pa u argumentuar ne nje kontekst apo rrethane te caktuar historike.</p><p> </p><p> </p>
Shume bukur, pikes i ka rene
<p>Shume bukur, pikes i ka rene Stefani. Kjo mund te quhet me te vertete shembje idhujsh. Te ishte per mua, duhej nje ligj qe askush te mos qeverise me shume se 4 vjet rresht popullin tone.</p>
Se kuptoj se si keta
<p>Se kuptoj se si keta pseudogazetaret e sotem sic eshte Muci, Lubonja apo Andrea qe dine te shkruajne vetem hartime, kerkojne te dalin kunder Prof te madh Rexhep Qosja. Vleresimet e akademikut Qosja jane aq te verteta dhe te thella ne lidhje me Figuren madhore te Enver Hoxhes sa cdo perpjekje per ta reduktuar sistemin e Enver Hoxhes vetem ne represionin e tij, gjamse ne emer te mbrojtjes te "viktimave se tij" ne emer te drejtave te njeriut sot, eshte jo vetem qesharak, por dhe talles , kur te gjithe sot per 22 vjet shkerdhatokraci e dime sh mire se sa humbje lirish dhe te drejtash njerzore, si dhe jetesh ka sjelle sistemi anarshise sotme ne krahasim me sistemin gjamse represiv te Enver Hoxhes. Ky pseudogazetar qe ben tere kohes vetem bla bla dhe asgje tjeter, duhet ta dije qe:</p><p>ekziston nje varesi e forte, e lirise dhe drejtave te njeriut ne varesi te zhvillimit ekonomik , te ardhura per koke, shkalles se urbanizmit, zhvillimit industrial, ku ne sherbim te kesaj kerkohet nje nivel i larte shkollimi dhe perhapje se teknollogjise se komunikacionit qe te ndertohet nje demokraci ku respektohen ne menyre maximale te drejtat e njeriut.</p><p>Kjo do te thote qe demokracia dhe lirite individit varen teresisht nga mireqenia ekonomike, tregues i struktures se shoqerise me nje urbanizim te larte, ekzistencen e nje shtrese te larte te mesme qe ndikon ne nje perhapje te gjere te industrializimit dhe shperndarjes te drejte te mirave matariale.</p><p>Tani le te analizojme nen kete sy rezultatet e sistemit te Enver Hoxhes!</p><p>1. Sistemi Hoxhes e ktheu vendin nga nje vend mesjetar otoman ne nje vend industrialo- agrar.</p><p>2.Ne sherbim te industrializimit ngriti nje sistem te larte shkollor dhe kulturor .</p><p>3.Krijoj nje urbanizim te larte te shoqerise duke marre per baze se si e gjeti shqiperine Hoxha ne 1944, natyrisht jo ne ato permasa qe ishin ne perendim, por rendesi ka qe brenda mundesive u ngriten qytete te panumerta industriale.Rritja e urbanizmit ishte e admirueshme.</p><p>4. Krijoi nje shtet modern qe garantonte nje shperndarje te drejte te mirave materiale dhe ketu duhet theksuar qe cmimi i kesaj ndarje ishte shume i larte pasi per tu mbrojtur nga abuzimi, vjedhja dhe keqperdorimi u ndertua nje represion i larte shteteror-social pasi abuzimi per te perfituar dhe vjedhur ne kulturen shqiptare ishte jashtemase i larte, ( sic e vertetuan keto 22 vjet anarshi) saqe coj ne numrin e larte te ndeshkimeve te kohes brenda ligjeve te sistemit ne fuqi. Prandaj eshte ne kete pike mbrotja gjamse e "viktimave te kohes se Hoxhes " qe bejne sh gazetaruce te kohes se shkerdhatokracise eshte mashtrim dhe qesharake ne cdo kuptim.</p><p>Tani shtrohet pyetja se kush ka bere me sh per ndertimin e demokracise te vertete, sistemi Hoxhes apo sistemi sotem i degjeneruar i korrupsionit, i vjedhjes, i krimit dhe shkaterrimit kur shoqeria shqiptare po kthehet ne mesjete me hapa dhe ritme galopante.</p><p>Sistemi Hoxhes pati nje krize qe pasardhesi tij Ramiz Alia nuk diti ta menaxhoje sic e menaxhoje Kina socialiste duke vazhduar rrugen e industrializimit dhe te urbanizmit qe ne nje te ardhme te afert ti jape Kines ate qe ka sot bota perendimore respektim dhe ruatje shume here me te larte te dinjitetit njerzor se dhe vete ne vendet e perendimit sot.</p><p>Prandaj eshte qesharake percapjet qe bejne sot gazetarucet e llafollogjise per tju kundervene vleresimit akademik te Prof te madh Qoses. Te mundohem sa te duan llapaqenet e sotem per ta reduktuar sistemin e Hoxhes vetem ne sistem represioni, por per mua ka qene kontribuesi i vetem me i madh ne shqiperi per ndertimin e demokracise se vertete, nese vepra e tij do kishte gjetur vazhdim pas vdekjes se tij. Lavdi vepres se tij qe u shkaterrua qellimisht nga plehrat e kombit shqiptar!</p><p> </p>
Qe ne fillim,Andrea eshte i
<p>Qe ne fillim,Andrea eshte i lire kur shkruan dhe kjo eshte e rendesishme; nuk ndihet inferior dhe sjell argumentet e tij.Ok deri ketu.Nga ana tjeter,prof.Qosja ka dhene nje version te tij historik mbi EH,dmth versionin historik, qe ta quash"lajthitje"do goxha"palle"(italisht kjo per ish pedagogun tim)sepse versioni historik nuk eshte pikepamje.Psh, Xhorxh Uashingtoni pare nga Thomas Payne ishte nje derr konformisti e pa ndjenja,"...merrni nje cope shkemb dhe mos e gdhendni fare, ky eshte Xh.Uashington"-thote Th.Payne kur Uashington e la ne balte me mosmirenjohje, kjo e sjelle ne esene mbi Th.Payne nga nje mendimtar i kalibrit universal si Bertrand Russell.Per B.Russell patriot e humanist i vertete ishte Th.Payne, revolucionari i madh anglez, qe sipas Russell"Siç ndodh gjithmone,bota e denoi(Thomas Payne)per altruizmin e tij; fama e tij do ishte me e madhe sikur ky te ishte me pak shpirtmadh".Andrea te me fale qe ia"zvogelova"Uashingtonin, pasi me rezulton se nuk ishte aq burre i madh, gjithmone sipas B.Russell.Krahasimi i EH me Hitlerin eshte pa linjen thelbesore t ngjashmerise; une nuk besoj se nazizmi ishte pjelle ideologjike e dale nga mendja e Hitlerit siç komunizmi nga mendja e EH; keto ishin ideologji dominante qe do gjenin perfaqesuesit e tyre,qofte se do ekzistonte Hitleri me mish e me kocke apo EH. Nazizmi lindi fillimisht si nje rryme nacionaliste, e afte te bente mjaft njerez me vete duke shfrytezuar veshtiresite imperialiste te Gjermanise ne drejtim te ekspansionit te tregut, pengese e te ciles ishte bota e atehershme unipolare dhe kushtet e Traktatit te Versajes.Versioni me imbarazant do qe nazizmi lindi si ideologji imperialiste pertej opqeanit dhe u aplikua ne Gjermani, madje ndokush e shtrin harkun komplotist deri pas luftes, ku thuhet se Hitleri vdiq ne Argjentine, Bmb atomike amerikane u be aktive fale komponenteve plotesues gjermane, etj etj,qe me mire ti injorojme se dalim jashte teme.Duke iu shtuar oreksi, nazizmi kaloi kufijte e nje dikature oligarkike nacionale siç na meson gjithmone historia; termi quhet Lebensraum, qe do te thote hapesire vitale, çdo perandori ka nevoje per hapesiren vitale, biles edhe Amerika e ka shtrire hapesiren e saj vitale deri pertej Kaukazit.Gjermanet e mbeshteten Hitlerin se ky u premtoi tokat e pafundme ruse dhe sklleverit ruse te pafund; kjo eshte e verteta Andrea dhe nuk ndodhi me ndonje popull analfabet siç qene gjysherit tane, por me nje popull filozof si gjermanet, populli i Getes, i Niçes, i Hegelit,i Bethovenit,i Marksit dhe Fojerbahut;ky i fundit ka thene"Njeriu eshte çfare ai ha".Hitleri ua ofroi gjermaneve ate gjelle qe ata deshen dhe e dime perfundimin.Analogjisht edhe EH i ofroi popullit ideologjine e tij,por ama EH vinte nga lufta partizane.Ndryshe nga Hitleri qe dergoi gjermanet per te pushtuar,EH komandoi nje lufte çlirimtare.Ndryshe nga Hitleri qe nisi nje lufte ndaj botes per Lebensraum dhe per interesa puro te imperializmit gjerman(luften e inkurajuan Bosch,Thyssen-Krupp,M.Benz e Koch)EH ndoqi nje rruge krejt te kundert.Pramtoi nje reforme agrare qe realisht e realizoi,tjeter se pas disa vitesh i vuri ca pyka dhe e shtetezoi prape,por sistemi kooperative ekziston edhe ne kapitalizem ama.Natyrisht EH ndertoi nje dikature,ku me keqardhje une nuk besoj se do kishte ndonje forme tjeter alternative te qeverisjes.Si qeverisej Jugosllavia?Mua me rezulton se ishte nje dikature komuniste edhe ajo,Greqia ishte ne lufte civile dhe diktature ushtarake.Ku ka"lajthitur"prof. Qosja ketu,se une nuk po shoh gjekund lajthitje?Ngritja e ushtrise dhe ruajtja fanatike e kufijve mund te quhen paranoje diktatoriale, por edhe njefare patriotizmi mund te klasifikohet.Persa i perket lirise, jam kureshtar ku ekziston ai Eden ku zhvillohet kjo peme e çuditshme,se ne kete bote liria rritet ne vende shume te ngushta,brenda mendjes se individit.Per shume shkaqe,tmerresisht per mbijetese ne nuk jemi te lire.Frojdi thote qe kultura&civiliteti jane produkt i represionit,kurse liria absolute eshte shperthim i instikteve.Edhe demokracia nuk eshte liri e kompletuar,eshte nje version i lirise siç e konceptojne kohet tona,siç liria ka qene me e natyrshme ne antikitet sesa tani.Nuk çlirohemi nga EH duke e mohuar periudhen e tij,qe pak a shume eshte nje pjese e harxhuar e jetes sone,por duke evidentuar me kuraje difektet dhe metodat e gabuara."E dua Platonin por me shume dua te verteten"-thuhet me gojen e Aristotelit,ndaj do preferoja kresaj rradhe "lajthitjen" e prof.Qoses,qe vetem lajthitje nuk eshte.</p>
Interneti ne rast se do te
<p>Interneti ne rast se do te dish ta perdoresh per gjera te dobishme te ndihmon per te kuptuar boten materiale dhe ate shpirterore te njerezve. Ai eshte dhe nje mjet i fuqishem komunikimi dhe shkembimi mendimesh. E bera kete hyrje per te shprehur pelqimin dhe kenaqesine qe ndjeva kur lexova, nder te tjera, komentet e Ijs dhe RP. Pa dashur tu bej qejfin, kishin nivel arsyetimi. Por kam nje verejtje per RP. Enveri beri diçka te zymte dhe te denueshme qe nuk e shplan as uji i detit. Dhe te panevojshme. Ai vrau Fjalen e Lire. Ta denonje tjetrin per nje fjale goje, per nje opinion, ndonjehere krejt te paqellimshem, kete vetem ai mund ta bente. Paranoja e tij u vertetua edhe kur vrau pothuajse te gjithe shoket e tij. T'i themi te bardhes e bardhe dhe te zezes e zeze. Kjo te ben qe te jesh nje njeri qe mendon me koken e tij. Ndryshe duhet te biesh ne nivelin e fanatikeve te sotem te Berishes. </p>
katarakti, nuk prish pune
<p>katarakti, nuk prish pune kritika.Fjala e lire mungon edhe ne Kine, por kinezet e mbeshtesin rregjimin, me shume per oportunitet.Kete nuk e thone kinezet, por perendimoret.Edhe ne Kine behet nami sot po te shash rregjimin, por kur kalon çdo vit nga 100 milione njerez nga gjendja e varferise ne gjendje mesatarisht te pranueshme quhet sukses socialekonomik(kete e thote Nobel per ekonomine, Amartya Sen).Kam idene se duhet degjuar me vemendje nje i ndriçuar si Prof.Qosja, se une kollaj do shpallja shenjt Andrean, por nuk eshte keshtu.Sot kemi Liri te tepruar Fjale, por a jemi te lire?Facebook i jep mundesi te gjitheve te shprehen, por a ia ve veshin kush? Kam lexuar nje gjysem biografi te Zuckerberg(ky krijuesi i Fcb)dhe sepse dyshoj qe Fcb FALAS eshte nje sy dhe vesh global per te kontrolluar boten dhe manipuluar masat.Ne eshte kjo LIRI atehere une paskam ardhur ne boten e gabuar.Ia kalofshi mire!</p>
Add new comment