Qeveria serbe kontratë me Podesta Group: Mbroni interesat tona në Washington!

Qeveria serbe ka pajtuar kompaninë e fuqishme amerikane të PR-it dhe lobingut ‘Podesta Group’ për të mbrojtur interesat serbe në Washington. Marrëveshja mes Beogradit dhe kompanisë amerikane ndodh në kohën kur bisedimet me Kosovën janë në proces dhe kur beteja diplomatike është në pik. Lajmin e bën të ditur e përditshmja prestigjoze serbe ‘Blic’, sipas së cilës kontrata mes palëve është lidhur në fillim të tetorit 2011 dhe parashikon që qeveria serbe t’i paguajë firmës amerikane një shumë të majme prej 100 mijë USD në muaj. Një pjesë e parave, 25 mijë USD, sipas ‘Blic’-it do të shkojnë për ‘Robert Robert’, një firmë të pajtuar nga ‘Podesta Group’ për të lobuar në favor të Serbisë në Kongresin Amerikan. Në kontratë saktësohet se ‘Podesta Group’ duhet të ndërmarrë një fushatë që lehtëson qëllimet strategjike të Beogradit dhe mundëson marrëdhëniet efikase mes Serbisë e Shteteve të Bashkuara si dhe përfaqësimin e interesave serbe në institucionet përkatëse në Washington.

H.B.