Intervista e Topit për Alfred Pezën: tri pakujdesi dhe një gjysmë-shaka

Eshtë lajmëruar me ngulm si intervistë për ‘jetën’ e Topit, por pavarësisht momenteve apolitike nuk ka mundur t’i shpëtojë politikës. Presidenti i Republikës Bamir Topi ka qenë përballë gazetarit Alfred Peza të premten mbrëma në një intervistë të gjatë e të konceptuar si dalje nga formati i zakonshëm i talk-show-ut politik. Megjithatë, ka prodhuar njëfarë show, politik ose jo. Së pari, ka qenë befasues fakti se Presidenti i Republikës e nget makinën pa lidhur rripin e sigurimit gjë që është dëshmuar nga pamjet e kameras së Vizion Plus-it gjatë intervistës në makinë. I çuditshëm ka qenë edhe kodi i veshjes së Presidentit. Askush në stafin e tij nuk ka menduar se një intervistë “familjare” dhe e çlirët duhej shoqëruar edhe me një braktisje të kostumit të politikanit dhe me një veshje më informale. Sa për të vendosur një shenjë barazimi mes gjërave. Gjuha, për t’iu kthyer një modeli komunikimi për të cilin z. Topi është qortuar shpesh, ka qenë po aq e thatë sa edhe ajo e intervistave politike. Në fund, kur gazetari Peza ka bërë epilogun e emisionit, nuk ka mundur të anashkalojë një sondazh të një mediumi të huaj, sipas të cilit Presidenti Topi ngjaka si George Clooney. Dukej sikur Alfred Peza ishte trajnuar për të mos qeshur kur do e thoshte këtë para kameras.

H.B.