Shqiptarët kanë filluar të ftohen me Europën?

‘Albanian Institute’ ka publikuar një raport të vetin, ku e dhëna kryesore e disi befasuese (e dalë me sa duket nga anketimet e bëra në terren) ka të bëjë me rënien e numrit të shqiptarëve që mbështesin anëtarsimin e vendit në BE. Dhe krahasimi bëhet me një vit më parë. Në vitin 2010 niveli i mbështetjes së idesë së anëtarsimit të Shqipërisë në BE ishte në masën 93%, dhe kjo është afërmendsh një shifër tepër e lartë, gati e frikshme. Ndërsa për vitin 2011 kemi një rënie në nivelin e 80%-ëshit. Shifra është prapëseprapë e lartë, e në këtë kuptim shqiptarët ende mund të konsiderohen pa frikë si një komb a shoqëri që e duan integrimin në Europë. Por ajo që të bie në sy është rënia e fortë prej 13%-ësh, e cila do të ish interesante, nëse do të shenjonte fillimin e një tendence.

“Shqiptarët e kanë humbur interesin për t’u bërë pjesë e Bashkimit Europian”, u shpreh ambasadori i BE-së, Ettore Sequi, në një tryezë të organizuar me synimin për të diskutuar shifrat e të dhënat e këtij raporti. Me këtë pohim, ai sigurisht që u bie më fort se sa duhet borive të alarmit, por shpjegimi që i bën kësaj dukurie duket i saktë, ndonëse mund të mos jetë i vetmi: është kriza e tejzgjatur politike në vend, e cila solli edhe refuzimin e statusit të vendit kandidat për të dytin vit radhazi.

E.G.