“Dezertorët” krijojnë probleme në opozitë

Ajo që ndodhi në Vlorë, ku këshilli i dominuar qartë nga opozitarët ra në duart e një PD-isti , ka trazuar ujrat në kampin rozë. Ngjarja në fakt është e rëndë, dhe tregon se mendjet e mbrapshta kanë filluar të rekrutojnë ku e si të mundin deputetë, këshilltarë, krerë të administratave komunale, etj, me synimin për  të mbajtur e kontrolluar pushtetin sot e për ta rifituar atë nesër. Por ngjarja është e rëndë edhe për diçka tjetër: tregon se strukturat e opozitës, në veçanti të PS-së, janë duke dremitur përballë mobilizimit të këtij lloji të partive të maxhorancës.

Erion Braçe ia hidhte fajin sot në mëngjes partive aleate të PS-së, atyre të vogla, këshilltarët e të cilave kanë votuar krejt papritur për kandidatin e të djathtëve për postin e kreut të Këshillit të Qarkut të Vlorës. Ndërsa Paskal Milo, pa qenë i përmendur nga Braçe, është bërë i gjallë pasdite për të nënvizuar se këto “rrjedhje” janë përgjegjësi e të gjithëve, e në radhë të parë e socialistëve. Nga mikorofonat e televizionit News 24, ai i është kthyer Beratit, ku u vu re e njëjta dukuri, dhe ku të konvertuarit kanë qenë “përfaqësues të PS, deri dhe kryetarë komunash”.  

“Me sa duket, ka njerëz në PS që nuk duan ta analizojnë si duhet këtë që po ndodh, e nëse nuk analizohet si duhet, ka për të patur zhvillime të tjera negative”, paralajmëron, a kërcënon, a parashikon Paskal Milo. Duket se, pavarësisht nga motivimi që mund të ketë, shefi i Demokracisë Sociale ka të drejtë. Opozitës i duhet të gjejë mënyrat për ta përballuar këtë fushatë mercato-je.

E.G.