Ngjarja e Durrësit: Policia ngutet për të folur për vetvrasje?

Sot shtypi ka folur dhe për skenarë të tjerë, të cilët mund të qëllojë të jenë hamendje kuturú, por nuk mund të përjashtohen si pista hetimi (mjaft të mendosh që familja e përjashton vetvrasjen). Policia e ka bërë mendjen top, megjithatë. Policia shqiptare është e vetmja që komunikon me shtypin për t’i dhënë këtij të fundit përfundimet e hetimit vetëm disa orë pas krimit. Kudo, edhe kur krimi duket i qartë dhe autorët e tij vetdeklarohen si të tillë, policia nuk ngutet për të nxjerrë përfundime (për më tepër, nxjerrja e përfundimeve nuk është punë e policisë; është e prokurorisë; është me kushtetutë kështu). Ndërsa policia jonë është në gjendje ta ndriçojë një krim kaq të çuditshëm në harkun e dy orëve, dhe t’i vërë gishtin tak-fak autorit të krimit.Po e mbyllim këtë shkrim prapë me pyetje: e mbani mend kur ka qenë hera e fundit që policia shqiptare ka zbuluar autorin e një krimi, me kusht që autori të mos jetë viktima?