Arid Uka përballë ushtarit amerikan, në kokën e të cilit i ngeci arma

Arid Uka (në foton shoqëruese është tok me avokaten e tij) është vënë sot në një gykatë të Gjermanisë përballë ushtarit amerikan, të cilit ai do t'i merrte jetën, por rastësia ia shpëtoi. Nuk dihen emocionet e amerikanit Trevor Brewer, kur është përballur me vrasësin e shokëve të tij, por ndoshta më shumë se gjithçka ka menduar për atë "klikun" e thatë që ka lëshuar këmbëza e pistoletës së Ukës dhe që e ka penguar të shkrehë plumbin që do t'i merrte jetën. Arid Uka, shqiptar nga Kosova me banim në Gjermani, akuzohet për vrasjen e dy ushtarëve amerikanë në aeroportin e Frankfurtit në muajin mars. Trevor Brewer ushtari që i mbijetoi të shtënave fatale i tha gjykatës se kur e pa Arid Ukën në fytyrë, pa “urrejtje në sytë e tij”. Brewer, 23-vjeç, ishte në autobusin transportues të “U.S. Air Force” në aeroportin e Frankfurtit, kur Arid Uka qëlloi për vdekje dy ushtarë amerikanë, Nicholas J. Alden,  25-vjeç, nga Karolina e Jugut, dhe Zachary R. Cuddeback, 21-vjeç, nga Virgjinia, më 2 mars. “Kur pashë lart, pistoleta e tij ishte në fytyrën time. Dëgjova fjalët Allah u Akbar dhe pistoleta bëri një ‘klik’”, ka thënë Brewer, sipas Radios Europa e Lirë. I pyetur nga gjykatësi se si do ta përshkruante shprehjen e fytyrës së Ukës atë ditë, Brewer u përgjigj: “Ai po shikonte të na vriste, kishte urrejtje në sytë e tij”.
H.B.