Aleanca Kuqezi në qendër të një raportimi të Reuters-it

Në një raport të gjatë të agjencisë Reuters rreth problemeve me regjistrimin e popullsisë në Ballkan, një seksion i veçantë ka në fokus Aleancën Kuqezi. Kreshnik Spahiu, udhëheqësi jozyrtar i kësaj aleance, i ka deklaruar Reuters-it, se rezultatet e censusit, në mënyrën sesi po zhvillohet mund të trondisin themelet e modelit të mirë shqiptar të tolerancës etnike e fetare. Reuters-i raporton se anëtarët e Aleancës Kuqezi shpalosën javën e kaluar një flamur gjigand të asaj që ata e quajtën Shqipëria Etnike e 1912-ës, pra të Shqipërisë ende të papërcaktuar nga kufijtë e dizenjuar prej Fuqive të Mëdha. Me këtë rast ata bënë thirrje që shqiptarët të bojkotojnë pyetjen për etninë, në mënyrë që llogaritja e saj të bëhet e pavlefshme. “Unë besoj se ky census ka si qëllim fundor kthimin e Shqipërisë në një Liban të dytë,” i deklaroi Reuters-it Pëllumb Xhufi, një historian që përkrah Aleancën Kuqezi, dhe ish-Ministër i Jashtëm i Shqipërisë. 

E.Z.