Haxhi Qamili dhe Toptanët nuk janë Tirana

Përmendja për keq e familjes feudale Toptanase nga ana e kudofolësit Sali Berisha u mor nga shumë lexues, dhe jo  pa të drejtë, si një lapsus, dukuri e zakonshme kohët e fundit nga i stresuari Berisha, i cili në vend të Esat Pashës, që tradicionalisht quhet tradhtar por, që për të nuk ka ende një studim shterues, përmendi një familje të tërë, Toptanasit, me shumë përfaqësues të nderuar e njerëz të ndershëm e qytetarë të Tiranës. Sepse, që një feudal të mjaftohet me sundimin e trojeve të tij, i çinteresuar për tokat e tjera të banuara nga bashkëkombas, nuk paraqet ndonjë çudi për bartësit e mentalitetit feudal e mesjetar. Sot po, që është turp. Sigurisht, Esati gabohej (në se nuk gaboj unë), kur këtë e kërkonte, pasi ishte shpallur pavarësia, por kjo ishte mendësia e tij dhe interesat e tij.

Nuk kaluan veçse pak ditë dhe të njëjtin vlerësim për një tiranas tjetër, i cili me ligj duhet respektuar, e dëgjuam nga goja e shthurur e Jozit, që nuk e lidh asgjë me qytetarinë shkodrane. Krahasimi i Presidentit me Haxhi Qamilin, një katundar prapanik nga fshati Sharrë ishte i turpshëm, por jo për ata që nuk kanë turp të turpërohen. Kjo nuk mund të jetë rastësi, veçse rezultat i bisedave të tyre kundër tiranasve si banorë të trevës dhe qytetarëve në përgjithësi e demokrat. Ky gjykim i rrezikshëm për të ardhmen dhe njësinë e kombit, si përçarës që i kundërvënë veriun pjesës tjetër, duhet dënuar dhe bartësit e tij, që krahinarizmin e kanë ngritur në politikë kuadri dhe shpërblimesh me mall të vjedhur nga shteti (privatizime e tenderë) dhe pronarët (legalizimi), duhen larguar (po flas me gjykimet e tyre) nga skena politike për të shpëtuar të ardhmen e vendit dhe  të fëmijëve tanë.

Në mungesë të një opozite reale që t’i dalë për zot popullit, duhet ne populli të zgjohemi e t’i thërrasim mendjes. Këtë duhet ta bëjnë jo vetëm qytetarët e vjetër e ata të ardhurit e vjetër të qytetit, por dhe ata të kohëve të fundit, që nesër në mos ata, fëmijët e tyre, do jenë krenarë të thonë se jemi tiranas. Turpin le ta mbajnë primitivët që vetëquhen nacionalistë lokalistë. Atyre nuk duhet t’iu nënshtrohemi.