Taxhikistan: Ndalohet frekuentimi i xhamive nga minorenët

Udhëheqësi i Taxhikistanit, presidenti Emomali Rakhmon, ka marrë një vendim që ndalon minorenët të shkojnë në xhami për t’u falur e lutur. Taxhikistani është një republikë laike e qeverisur me dorë të fortë nga Presidenti i vet, i cili i fiton gjithmonë “zgjedhjet e lira”, por nga ana tjetër popullsia e këtij vendi është e tëra myslimane (saktësisht në masën 98%). Ky vendim (në fakt, është ligj i miratuar nga parlamenti dhe i firmosur e dekretuar nga Presidenti) synon të minimizojë rolin e ndikimin në rritje të Islamit në këtë republikë të Azisë Qendrore. Kreu i plotëfuqishëm i shtetit, Emomali Rakhmon, i injoroi të gjithë zërat e shoqërisë civile, të veprimtarëve të të drejtave të njeriut, dhe të opozitës së përfaqësuar nga një parti islamike, të cilët i kërkuan të mos e firmoste ligjin e miratuar nga parlamenti.

I njëjti ligj ka dhe kufizime të tjera në këtë drejtim, pasi i ndalon të gjithë ata që janë nën moshën 18 vjeçtë frekuentojën shkolla fetare apo xhamija, që luajnë funksionin e shkollës. Deri në këtë moshë, edukimi duhet të jetë shekullar, sipas ligjit.

Kjo ngjarje ka provokuar interes për shkak të pozicionit gjeo-strategjik të këtij vendi e për shkak të ndjeshmërive fetare në atë pjesë të Azisë. Vendet kufitare me Taxhikistanin janë Uzbekistani, Kirgistani, Kina, dhe Afganistani. Me këtë të fundit ndahet nga një kufi i gjatë, dhe lehtësisht i penetrueshëm. Në vitin 1997 (ju kujton gjë ky vit? Ndoshta po) vendi përjetoi një luftë civile midis forcave qeveritare e një koalicioni të demokratëve me islamistët. Tani janë duke jetuar në paqe, por rreziqet janë të pranishme gjithë kohën. Bën vaki që ky ligj t’i hedhë benzinë zjarrit. Qasjet e forta laike nuk janë një gjë e zakontë në atë qoshe të botës.