Ç’po ndodh me karburantet?

Në 6-mujorin e parë të këtij viti, sipas Drejtorisë së Përgjithshme të Doganave të Shqipërisë, u importuan rreth 171 mijë ton karburante ose rreth 50 mijë ton (23%) më pak se në 6-mujorin e vitit të kaluar. Shumë studime ekonomike tregojnë se ka një korelacion të fortë pozitiv mes rritjes ekonomike dhe konsumit të karburanteve kudo në botë. Një korelacion i tillë konstatohet edhe për Shqipërinë në periudhën 2006-2010. Sipas FMN-së, rritja mesatare vjetore e Produktit të Brendshëm Bruto në Shqipëri ka qenë 5.7% gjatë kësaj periudhe. Ndërkohë, rritja mesatare vjetore e importit të karburanteve në të njëjtën periudhë ka qenë 7.7%.

Po çfarë ka ndodhur në 6-mujorin e parë të këtij viti, kur importi i karburanteve u ul 23%, krahasuar me një vit më parë? Mos është tkurrur  në mënyrë korrelative edhe ekonomia, përkundër rrahjes së vazhdueshme të gjoksit nga Berisha? Mos është përzjerë nafta virgjine e brendshme me karburantet e importuara, duke ulur kështu nevojën për t'i importuar ato 50 mijë tonët që i dalin doganave deficit?  Apo mos vidat e traut të doganave u liruan këtë vit? Ndoshta është një kombinim i të trijave.  E.Z.