A. Kurti: Ishim krahinë, e thoshim ‘jemi republikë’; jemi me fusnotë, e themi ‘jemi shtet’

Albin Kurti ka shkruar në Zëri një artikull mbi diplomacinë kosovare me titull ‘Brenda, pra jashtë”. Fillimisht, ai e ngarkon disi narracionin e tij dhe bën një lojë të gjatë stilistike me përcaktorët ‘brenda’ e ‘jashtë’: “Politika e jashtme dhe politika e brendshme janë të ndërvarura; ajo që jemi jashtë varet nga ajo që kemi brenda; kur politika e jashtme është e lidhur për politikën e brendshme, njëmend i ke të dyja: edhe politikën e jashtme, edhe politikën e brendshme. Nëse politika e jashtme nuk varet nga brenda, atëherë ajo varet nga jashtë. Në rastin e Kosovës, kjo jashtë nuk është vetëm jashtë, por tashmë është, dhe madje gjithnjë ishte, edhe brenda.”

Por merret vesh shpejt për çfarë e ka fjalën. Kërkon një politikë të jashtme të frutshme. Dhe për t’u bërë e tillë, duhet të synojmë – thotë Kurti me fjalët e veta – marrëdhëniet bilaterale e jo ato multilaterale, në kurthin e të cilave na ka futur një protektorat ndërkombëtar multilateral. “Aspirata për rritjen e numrit të njohjeve të pavarësisë së Kosovës ka zënë t´i lëshojë vend tendencës për pjesëmarrje e përfaqësim në nismat, konferencat e forumet rajonale e ndërkombëtare; emri i shtetit pa fjalën Republikë dhe me fusnotën që na e konteston shtetësinë u pranua pikërisht që Kosova të mund të marrë pjesë në forume rajonale; ashtu qysh dikur s´ishim bash republikë, sepse ishim krahinë në federatë, edhe tash s´jemi bash shtet, sepse kemi fusnotë kur shfaqemi në rajon”, thotë ai.

Kurti është i shqetësuar që Kosovën nuk e kanë njohur vendet e BRIC-ut (Brazil, Rusi, Indi dhe Kinë) dhe pesë vende të BE-së; është i shqetësuar, pasi “sa më gjatë që nuk na njohin, zvogëlohen gjasat që do të na njohin në një të ardhme të afërt: koha është faktor legjitimues”. Por është i idesë, megjithatë, që “Kosova duhet të përqendrohet në mishërimin e njohjeve të deritanishme më parë se në rritjen e këtyre njohjeve edhe me ndonjë ishull të mbetur në Oqeani. Kosova duhet të lidhë marrëdhënie e të bëjë marrëveshje me shtetet që na kanë njohur”. Për ta lexuar të plotë shkrimin e Kurtit, ndiqni linkun: http://ëëë.zeri.info/artikulli/3/20/52083/brenda-pra-jashte/  

E.G.