Fatos Nano insiston; por gjuha e tij po bëhet ajo e një lojtari politik

Fatos Nano i ka hyrë lojës presidenciale i motivuar si kurrë më parë. Si zor që ai “t’ia ketë bërë hysmetin” ndonjë gjëje kështu si po “ia bën këtë herë”. Gjasat janë të pakta, fare të pakta, që ta zgjedhin President, por ai po i luan të gjithë gurët, e po lëviz në mwnyrë të ethshme. Ai, apo të tjerë në emër të tij, kanë publikuar sot një deklaratë tjetër, e cila është pazakonshmërisht e gjatë. Ua dërgon Berishës e Ramës, të cilët i fton “që të bëhen së bashku në një Aleancë të Madhe Mirëbesimi, për të ndërtuar proçese të mirëbesuara e mirëkuptuara në mënyrë që të sigurohen produkte demokratike, të lira, properëndimore, proeuroatlantike”.

Dhe më tej i fton të heqin dorë nga “ngërçi i kategorizimit të kandidaturave në politike, jopolitike, shoqëri civile, etj, etj, dhe të përqendrohen me përkushtim dhe mirëkuptim që të kërkojnë kandidatët më të mirë për të zgjedhur Presidentin më të mire”. Dhe saktëson:  “Kategorizimi i kandidaturave, duke përjashtuar arbitrarisht kategori të caktuara, apo emra të ndryshëm, është vetëm shprehi e paaftësisë dhe mendësisë së gabuar të kësaj klase politike që po rrezikon ta shndërrojë çdo ditë e më tepër Shqipërinë në një vend Kryetarokratik. Kategorizimi i kandidaturave është vetëjustifikimi i Kryetarëve për të mbajtur nën kontroll situatën, për të vazhduar lojërat e pushtetit, për të fshehur dështimin e tyre në kapacitetin për të mirëbesuar dhe bashkërenduar me njëri-tjetrin, asgjësimin e garës dhe konkurimit të lirë, përjashtimin e publikut nga pjesëmarrja dhe konsultimi, si edhe për të fshehur deformimin e madh dhe zhvendosjen nga aksi dhe kultura demokratike e perëndimore.”

Ndonëse në fund ai u kthehet zotimeve e premtimeve të një aspiranti për President, në thelb kjo është një letër me gjuhën e një rivali të nesërm të Ramës e të Berishës.

E.G.