Edi Rama fton Berishën në “duel”

Në blogun e tij të radhës, Edi Rama e fton Berishën të debatojë me të publikisht për paktin e tij 10-pikësh. Ai shkruan: “Është koha kur Shqipërisë në udhëkryq i duhet një debat publik, ku Saliu dhe unë duhet të dalim të dy para shqiptarëve që përfaqësojmë dhe të ballafaqojmë ato që ata i dëgjojnë prej nesh veç e veç. Le të vijë e t'm’i thotë në sy ato që flet gojështhurur lartë e poshtë për bllokimin e vizave, bllokimin e integrimit, bllokimin e reformave dhe le ta debatojmë para shqiptarëve ofertën tonë, pikë për pike nga 1-shi tek 10-ta. Le të vijë e t'm’i tregojë në sy para opinionit publik po të dojë të gjitha arritjet historike të demokracisë, drejtësisë, ekonomisë, nën udhëheqjen e vet legjendare dhe ta debatojmë para shqiptarëve sesa të lumtur i ka bërë njerëzit qeveria e tij në këta gjashtë vjet. Le të vijë e ta bëjë publike përballë meje kundërofertën e tij, natyrisht nëse e ka një të tillë për të kërkuar mirëkuptimin e opozitës që të mbushen gropat e thella që Shqipëria ka përpara në rrugën e integrimit. Jam gati të mbroj ofertën tonë, të tregoj me prova, fakte, shifra të vërtetën e keqqeverisjes së këtyre gjashtë vjetëve, të dëgjoj me vëmendje të plotë kundërofertën nëse kjo ekziston. Shqiptarët pastaj le të na dëgjojnë e gjykojnë. I plotë, blogu i Ramës mund të lexohet në www.edirama.al.

Qysh pas garës së parë për kryebashkiak, Rama i është shmangur gjithnjë debateve publike me kundërshtarët e drejtëpërdrejtë politikë. Siç duket, ai tani e ndjen veten të sigurtë se do të ketë epërsi në një debat publik me kundërshtarin e vet më të fortë të këtyre 20 vjetëve.  

E.Z.