Fatos Nano: Nuk doni të garoj për President? Atëherë, pritmëni në garën për kryeministër!

Gjasat janë që Fatos Nano ta ketë fjetur mendjen, se nuk do të jetë pjesë e lojës presidenciale. Duket se është i zemëruar me të gjithë; duket se ka pritur ca më shumë mirënjohje, vlerësim e begenisje prej Berishës, Metës e Ramës. Dhe prandaj, deklarata e sotme vetëm disa orë para takimit Rama-Berisha i ngjan një shpërthimi. “Loja për pushtet e kryetarëve të partive është bërë një nxitëse dhe ushqyese e krizave si edhe pengesë për zhvillimin e shëndetshëm dhe marrjen e statusit kandidat për në BE të Shqipërisë. Loja për pushtet e kryetarëve, mbizotërohet nga mekanizmat dhe mendësitë meskine prej ngaku ata synojnë të rrëzojnë njëri-tjetrin. Ata luajnë e luftojnë veç për pushtet e motivohen nga dëshira dhe ambicia që ose njëri të mbetet Kryeministër, ose të bëhet tjetri i cili drejton derisot Opozitën”, thuhet në deklaratën e përgatitur në emër të një lëvizjeje të tij.

Ai i mbahet tezës se po pengohet të marrë pjesë në garën presidenciale, e zgjedh by default të marrë pjesë në një garë tjetër, ku s’mund ta pengojnë, zgjedh “t`i vetëofrohet publikut dhe qytetarëve shqiptarë për të konkuruar me të gjithë kryetarët e derisotëm për zgjedhjet e vitit 2013”. Shpjegon dhe se si, dmth me një alternativë, për saktësimin e së cilës shtie në punë një pafundësi adjektivash: “alternativë të qartë, vlerore, dalezotësie, paqebërjeje, jokrize, properëndimore, proeuropiane, prointegrim, konstruktive, bashkërenduese, bashkëpunuese, komunikative, mirëbesuese, gjithpërfshirëse, përbashkuese dhe prozhvillimit të shëndetshëm”.

E.G.