Presidenti, Rama i shmanget taktikës së Berishës për legjitimimin e procesit

Pas takimit me Metën për presidentin, nuk munguan mesazhet e Berishës ndaj forcave të tjera politike dhe specifikisht PS-së. Kryeministri foli për takime “të të mandatuarëve të tij”, përfshirë edhe atë, me të mandatuarit e PS-së dhe Ramën. Edhe pse i ka bërë thirrje më parë Berishës për dialog në lidhje me presidentin, Rama e ka lexuar ndryshe këtë apel duke e cilësuar të gjithë si një teatër. “Që kryeministri të bëjë teatër me takimet për presidentin e ri është zgjedhja e tij, por të flasë për besimin tim tek njerëzit e mi është turpi i tij! Kryeministri mund të takojë të tjerët për teatrin e tij, jo Partinë Socialiste. Nëse do negociata me ne, duhet të biem dakord paraprakisht për modalitetet. E kam ftuar Berishën zyrtarisht javë më parë, ka refuzuar t’u përgjigjet zyrtarisht; përsa i takon. PS-së është gati të dialogojë e negociojë kur Kryeministri të jetë gati”, - reagoi ai nga Twitter-i.

Deri më tani, nuk duket të ketë ndonjë ndryshim nga sjellja e Berishës krahasuar me eksperiencat e ngjashme të mëparshme. Mungesa e qendrimeve të qarta pas takimit me Metën ku palët qendruan në të njëjtat pozicione tregojnë se Berisha po përdor taktikën e vjetër; fillimisht legjitimon procesin e përzgjedhjes së presidentit duke u takuar me palët e duke i përfshirë në të, dhe më pas fillon pjesën e dytë të lojës, atë të sigurimit të votave për zgjedhjen e kandidatit të tij. Përgjigja e Ramës në këto kushte lexohet si një distancim nga një taktikë e tillë,  pas pësimit në vitin 2007.

S.E.