Anri Sala sjell filmin e vet ‘1395 ditë pa të kuqen’ në Tiranë

Artisti shqiptar Anri Sala kthehet në vendlindjen e tij, në Tiranë, por jo për të bërë një rit nostalgjik, apo për t’u takuar me miqtë e me të afërmit. Këtë herë kthehet për të prezantuar filmin e vet më të fundit me titull ‘1395 ditë pa të kuqen’. Është një bashkëpunim me artisten tjetër shqiptare, Liri Begenë, dhe me artistë të tjerë ndërkombëtarë. Fabula e filmit është Sarajeva e fillimviteve ‘990. Kanë qenë të shumtë artistët që janë ngacmuar prej Sarajevës së atyre moteve (ndërkohë që Anri Sala bënte xhirimet e filmit të tij, në kryeqytetin boshnjak ndodhej trupa Hollywood-iane e drejtuar nga Angeline Jolie, duke xhiruar filmin me titull ‘Land of Blood and Honey’), por Sala ynë luan me mjetet e artit bashkëkohor: një film pa dialog, me muzikën e Çajkovskit në sfond, me qytetin e Sarajevës që flet me muret e pallateve, me heshtjen e rrugëve, me kryqëzimet e frikshme që hyjnë në konin e shikimit të snaiperëve që gjuajnë nga kodrat përreth, me tingujt e orkestrës filarmonike të Sarajevës, me fytyrat pa shprehje të kalimtarëve të ftuar për të bërë aktorin, dhe me lojën e aktores së vetme në film, spanjolles Maribel Verdú, që i bie qytetit kryq e tërthor duke folur veç me dihatjen e me shikimin e vet.

Publiku që u gjend në premierë pati në fund të filmit një bisedë me Anri Salën, e cila u pëlqye po aq sa dhe filmi.

Re.Pu.