Dekoratat e fundit të një Presidenti që ka shpërndarë shumë dekorata

Presidenti Bamir Topi do të mbahet mend, në mos tjetër, për numrin e madh të dekoratave që ka shpërndarë. Edhe javët e fundit të mandatit po i shfrytëzon për të njëjtën gjë. në stil pajtues e gjithëpërfshirës. Ka dekoruar pra njëherësh myslimanë e të krishterë, klerikë e laikë, shqiptarë e të huaj, gegë e toskë, emra të njohur e të panjohur, etj, etj. Presidenti nderoi me urdhrin e lartë “Nderi i Kombit” Federatën Pan-shqiptare të Amerikës “Vatra”, duke i dorëzuar dekretin Gjon Buçajt, vlerësoi me “Medaljen e Mirënjohjes” Elez Hysen Biberajn, peshkopin Agathangel (Çamçe), pas vdekjes, At Vasil Markon, pas vdekjes, Sali Efendi Myftinë, pas vdekjes, Imam Vehbi Ismailin, pas vdekjes, Dom Prenkë Sokolin (Ndrevashajn), pas vdekjes, Van Sotir Kriston,  Antoni Athanasin, pas vdekjes, Ilir Demaliajn, dhe Agim Karagjozin. Dhe në fund, dy dekorata surprizë, njërën për aktorin e Hollywood-it Richard Gere, që “demaskoi e i bëri të njohur publikut amerikan, e më gjerë, krimin çnjerëzor, spastrimin etnik në Kosovë, në vitin 1999, nga makina ushtarake serbe, kundër popullsisë civile shqiptare që jetonte në trojet e veta” dhe tjetrën për Geraldo Rivera-n, që “bëri kauzë të tij ndërgjegjësimin e publikut amerikan, e më gjerë, për krimin monstruoz që po bënte makina ushtarake serbe, në vitin 1999, kundër popullsisë civile shqiptare të Kosovës, duke e demaskuar atë si një spastrim etnik dhe gjenocid”.

Re.Pu.