A do të veprojë prokuroria kundër Fahri Balliut?

Videoja e re e përgjimit të Dritan Prifitit ka gjasa të publikohet së shpejti, por ajo nuk pritet të kapë në befasi ndokënd, pasi përmbajtja e saj dihet, tanimë. Është fjala për një bisedë midis Dritan Priftit dhe Fahri Balliut në po atë zyrë, ku u bë dhe biseda tjetër e famshme, ajo mes Priftit e Ilir Metës. Videoja është në prokurori, dhe Prifti ka kërcënuar se do t’i hapë dritën jeshile publikimit të kësaj videoje veç nëse prokurorët nuk do të vihen në lëvizje.

Gazetat e sotme, në mungesë të prononcimeve të dorës së parë nga Dritan Prifti, i janë referuar shpjegimeve që ka bërë deputeti I PS-së, Erion Braçe, në profilin e tij në facebook. Afera ka të bëjë me skrapin, që kanë dashur t’ia shesin me kontratë një kompanie ruse. “Njeriu i afërt i Berishës dhe përmbaruesi i punëve të Ilir Metës shprehet në një moment të bisedës me Priftin se ‘ka aty plot për të gjithë, edhe për mua, edhe për Ilirin, edhe për ty’”, hedh dritë Braçe mbi përmbajtjen e videos. Kuptohet, “njeriu i afërt i Berishës dhe përmbaruesi i punëve të Metës” është Fahri Balliu, emri i të cilit ka dalë edhe në aferën e Gërdecit..

Prokuroria nuk ka vepruar deri tani, dhe nuk ka gjasa që të veprojë. Fahri Balliu vijon të jetë mik familjar i kryeministrit, gjë që duket dhe nga fotoja që shoqëron këtë lajm.

E.G.