Ambasadori turk përshëndet nisjen e trupave shqiptare në Afganistan: Dëshmi e lidhjeve vllazërore në shekuj

Një kontingjent i Batalionit Komando të Forcave të Armatosura shqiptare u nis me mision paqeruajtës në Afganistan, në kuadër të kontributit të FARSH në operacionin e NATO-s “Resolute Support Mission”.  Kontigjenti i katërt paqeruajtës i FA shqiptare do të shërbejnë për një periudhë 6 - mujore në Afganistan dhe do të veprojnë në përbërje dhe varësi të Komandës Rajonale turke në Kabul. Ambasadori i Turqisë në Shqipëri, Hidayet Bayraktar, në fjalën e tij përshëndetësë tha se "FA turke dhe FA shqiptare, kanë rritur performancën e tyre në fushën e mbrojtjes, duke treguar lidhjen e ngushtë mes popujve tanë, mbështetur në lidhjet vëllazërore në shekuj".

Në njoftimin e Ministrisë shqiptare të Mbrojtjes, nënvizohet se rreth 6 mijë ushtarakët e FA shqiptare janë trajnuar me afate të shkurtra apo të gjata në Turqi, ose në Shqipëri nga FA turke. Z. Bayraktar shprehu bindjen e tij se kjo njësi e re që do të niset për Kabul, do t’i përmbushë më së miri detyrat e saj ashtu si edhe tre kontigjentet e mëparshme.