Publikohen përgjimet e Veliajt nga burgu

Faqja online “Cna.al” ka publikuar në këto momente ato që i deklaron se janë pasazhe nga përgjimet që SPAK ka realizuar në përgjim të shtetasit Erion Veliaj gjatë qëndrimit të këtij të fundit në paraburgim. Siç edhe ishte përfolur në përgjime – duke supozuar se ato janë të vërteta – evidentohet një përpjekje e Veliajt që të orientojë disa media në funksion të interesave të ti. P.sh një fragment:

Në orën 16:21, Erion Veliaj bisedon me vëllain e tij Arbërin, të cilit i kërkon që të pyesë Karlon nëse i ka marrë përgjigjet e tij për emisionin që do të zhvillohet sot në darkë.

Në vijim të komunikimit, Arbëri i tregon se "kta shokët tanë” i kanë thënë që nesër do të zhvillohet konferenca me gazetarë. Erion Veliaj e orienton që takimi me gazetarët të bëhet me gazetarë normal, nga Top Channel, Report Tv, Tema, pa njoftim për shtyp që mos të vijnë gazetarët e Syrit apo MCN-ja. Erioni po kështu, i thotë që ata të bëjnë pyetje normale.

Në orën 16:22, Erion Veliaj bisedon me Ajolën, dhe kjo e fundit i thotë se ka folur dhe i ka thënë që po e bëjnë gati AI (inteligjencë artificiale). I kanë marrë përgjigjet dhe po e bëjnë gati. Po kështu, Ajola i tregon se e ka pyetur nëse do që të japë intervistë, por i ka thënë jo. Të njëjtën gjë i kërkon edhe Erioni, të rrijë sa më larg (nënkupton intervistës).

Në orën 18:05, Erion Veliaj bisedon me Ajolën dhe i kërkon që të flasë me Albin e "Ditës", sepse Geri Kokalari ka bërë një super intervistë te Report Tv, e kërkon që t'i japë prioritet intervistës së tij. Erioni i tregon se intervistën e tij do e publikojnë dy-tre gazeta, edhe Tema ndoshta. I kërkon që për këtë të bisedojë me Meron dhe Albin.

Në orën 18:07, Erion Veliaj bisedon me Arbrin, ku ky i fundit i tregon se “shokët tanë” i kanë thënë që intervistën (konferencën) ta bëjnë me të gjithë gazetarët, dhe për pyetjet që nuk duan të përgjigjen, do thotë se nuk flasin dot në këto momente. Më pas, Erion Veliaj i tregon Arbrit në lidhje me intervistën e Geri Kokalarit te Report Tv dhe i kërkon ta lidhë me Temën dhe Ditën (Gazeta), që t'i japin vëmëndje, pasi Shqiptarja do e bëjë patjetër

Për atë që punon në media, sikur e gjitha kjo të jetë e pavërtetë, është patjetër shumë normale. Pse? Ky është komunikimi, kjo është marrëdhënia në media. Carlo, Mero, Albi, Mira pak më tutje. Këta janë pikat e kontaktit për biseda tërësisht shoqërore. CNA zbardh edhe interesin e Veliajt për një farë Ilir Yzeiri, një gjini më vete morale kjo në botën tonë. Vetë Veliaj thotë se “presioni do mbajtur sa më lart” para vendimit të Apelit pasi përndryshe do pritur Gjykata e Lartë, “pas zgjedhjeve”.

E njëjta faqe ka publikuar edhe përgjime të tjera ku rezulton se Veliaj e quan ministrin e Drejtësisë, Ulsi Manja, “katundar dhe qelbësirë”, terma që nuk i kanë hije një të zgjedhur të popullit. Por më e rëndësishmja është se pas këtyre përgjimeve – ato ose duhen përgënjeshtruar, ose përfaqësues të mediave që përmenden aty duhet të reagojnë dhe të vënë dinjitetin në vend(mundet të kenë nuk ka pse të habitemi), ose përndryshe këtu kemi një provë të qartë se me çfarë kemi të bëjmë. A janë këto media ajo që pretendojnë se janë? A janë këta gazetarë diçka më shumë se xhambazë të lehjes, Demka dhe çimka antropomorfe? Dhe a duhet të jetë Veliaj një njeri që mban përgjegjësi publike? 

s.zaimi