Izet Haxhia, Ilir Meta, Arben Ahmetaj/Cili është dallimi mes këtyre dëshmitarëve - protagonistë?

Shumëkush e pa intervistën e kryeministrit Edi Rama për RAI3. Pa edhe videomesazhin e tij. Disa të tjerë kanë lexuar edhe diarenë e gazetarëve që janë gjithmonë gati të jenë sifoni i tij. Nëse e shohim si do z. Rama ta shohim ne këtë situatë duhet të ndajmë botën në dy pjesë: ata që kanë kundër Shqipërisë dhe të tjerë që punojnë për të. Varianti ideal për këtë delirant karabush do të ishte: Të ligjtë dhe Edi përballë. 

Nuk ka aty asnjë mendim për akuzat e ish-zv.kryeministrit, me zë dhe figurë. Siç ishte me zë dhe figurë një tjetër ish-zv.kryeministër më 17 janar 2021. Jo. Ky rast dallon nga ai. 
A thua ne nuk jetonim dhe nuk jetojmë në këtë Shqipëri – dje e Salës dhe Zenit, sot e Edit dhe Shefqetit apo Dulakut që i shkojnë pas. 

Edhe më tej akoma: sa herë e përdori shumica dëshminë mediatike dhe intervistat e Izet Haxhisë, ish-truprojës së Berishës? Sa herë e risjell çështjen e Remzi Hoxhës pa u munduar ta zbardhë një herë të vetme?! 

Nuk kanë rëndësi këto. Rëndësi ka "Portokallia" e Edi Ramës që ia mblodhi RAI-t duke nxjerrë faqebardhë jo vetëm Shqipërinë, por edhe duke ndihmuar me kapacitetet e veta demagogjike edhe Melonin. E cila i duhet shumë tani që me zgjedhjet europiane po vijnë  në pushtet të djathtët.

Çfarë do japë më për të blerë influencë? Aksesin? Çdo gjë të mundet. Çdo gjë. Këtë e dëshmon edhe fakti se kryeministri nuk e fsheh më banalitetin e vet si njeri, rrafshtësinë e vet morale dhe intelektuale. Nuk do të dijë më për formën dhe protokollin. Nën alibinë se “ky është Rama”(ky pra është për ata që kushedi çfarë e dinin) kryeministri po e shtyn tutje pikën kritike të relativizimit të çdo gjëje, të çdo bufonerie personale, sepse spektakli i sukseseve errësohet nga vulgariteti i korrupsionit. Nëse ka një gjë që provoi RAI edhe për ata që urrejnë sytë e tyre, nuk është ndonjë akuzë në vetvete, por banaliteti i lobimeve, vendimeve. Nuk ka aty asgjë të strukturuar, as të organizuar, as të menduar. Ka qeverisje me mendësinë e plaçkitjes. 

Na lejohet të imagjinojmë përgjimet e mundshme të tij me shefqetin dhe dulakun; do jenë identike si ato me Durim Bamin dhe Arben Ndokën, duke hequr vrasjet dhe trafiqet e duke vënë tendera e koncesione. Po pse a nuk ishte një shfaqje banaliteti videoja me Lefter Kokën dhe Nasip Naçon? Çfarë ka të organizuar aty? Hiç asgjë. 

Këmbëngulja e enturazhit të tij me këtë "aferën e RAI-t” ka të bëjë me shpikjen e një fitoreje të dyfishtë: RAI-t që ngec në llucën e Tiranës dhe Berishës që i atribuohet kurdisja e kësaj loje që nuk ndezi as në Itali.

E megjithatë z. Rama një gjë e ka kuptuar: në Itali ka armiq dhe jo të parëndësishëm. Jehona e qeverisjes së tij sado bukur të paketohet, shkon për atë që është dhe herët apo vonë, imuniteti që ofron argalisja e këtij karagjozi do përfundojë. Mjafton vetëm fakti që këtë energji po e harxhon për Berishën më 2024-n për të konfirmuar dështimin e plotë të dikujt që me 1 milionë shuplaka e nxori në pension atë me të cilin sot negocion.

s.zaimi