Anti-amerikanizmi, teza kadareane e Arvizusë

Ambasadori amerikan Aleksander Arvizu, në intervistën e së martës mbrëma për ‘Tonight Ilva Tare’, ka përmendur edhe shkrimtarin e shquar shqitar Ismail Kadare. Konteksti ka qenë deri diku banal po të gjykosh nga perspektiva e pyetjes: me cilin nga personalitetet shqiptare do të dëshironit të darkonit? E cila i ngjante më shumë atyre pyetjeve të miss-konkurseve këtu në Shqipëri apo botë. Arvizu, në përgjigje të pyetjes, ka përmendur shkrimtarin Kadare të cilin, sipas tij, e ka takuar dhe njëherë tjetër. Listës i janë shtuar edhe një grusht emrash të njohur të opinionshkruarjes-siç i quajti ambasadori- që nga Andi Bushati, Andrea Stefani, Mustafa Nano, Armand Shkullaku e të tjerë. Megjithatë interesantja nuk ka qenë listimi i emrave: me kë tjetër do donte të hante darkë ambasadori amerikan përveçse me ata që ‘trafikojnë’ informacion e opinione nga kulisat e politikës te publiku i gjerë; fut këtu edhe ambasadën amerikane?! Edhe pse e ka paraqitur si tezë të Artur Zhejit, teza në fakt i përket Ismail Kadaresë dhe është një sëmbim i vjetër që ka nxjerrë krye në disa libra me sprova apo intervista të shkrimtarit. Teza e anti-amerikanizmit së cilës ai i ka vënë përballë atë të frymës lindore, pro-sovjetike: një përzierje nostalgjie dhe dozash hakmarrjeje për rendin e vjetër të gjërave. Por deri diku banal, ashtu si edhe pyetja, ka qenë fundi i përgjigjes së ambasadorit amerikan. Kur ka shtuar se ai do të kish dashur shumë të darkonte me Nënë Terezën.

L.A.