Një kabllogram që bie si fshikull mbi Berishën

Ambasadori John Withers ka patur për Sali Berishën një mendim shumë më të keq se sa është menduar atomote dhe se sa mund të jetë përfytyruar në këto ‘kohë të kabllogramta’. Në një nga materialet e WikiLeaks-it, që mban datën 24 tetor 2008, ambasadori Withers përpiqet t’i bëjë një warming up Departamentit të Shtetit, përpara se ky i fundit të dërgojë për një vizitë në Shqipëri zv.ndihmësin e sekretarit të Shtetit, Stuart E. Jones. Situata politike në Shqipëri përshkruhet me tone dramatike e me nota të errëta, ndërsa vetë Berisha vizatohet në këtë kabllogram në mënyrën më të keqe të mundshme. Ja disa nga paralajmërimet dhe sugjerimet e dhëna:

-[duhet t’i përcillni Berishës] mesazhin e Washingtonit se sulmet e vazhdueshme për të përfrikësuar prokuroren e përgjithshme, kontrolli i sistemit të drejtësisë, përfshirë tentativën për një kontroll total të shërbimit sekret, gjithashtu dhe të medias së lirë, janë të papranueshme. Të tilla veprime, jo vetëm kërcënojnë të ardhshmen e Shqipërisë në NATO, por gjithashtu mund t’i shkaktojnë për një kohë të gjatë dëme marrëdhënieve bilaterale.

-Ne kemi çdo arsye të besojmë se tentativa e sekuestrimit të dosjes hetimore nga Prokuroria e Përgjithshme, përfshirë kërcënimet ndaj prokurorëve për t’i arrestuar, janë aprovuar nga Berisha. Teksa hetimi mbi Gërdecin është duke përfunduar, po duket se mundësitë e përfshirjes së djalit të kryeministrit do të jenë shkatërruese politikisht për Berishën dhe me pasoja kriminale për djalin e tij, Shkëlzenin.

-Berishës duhet t’i thuhet nga ana juaj në mënyrë të drejtëpërdrejtë, se të tilla sulme të vazhdueshme po shkaktojnë ndërhyrje në pavarësinë e institucioneve, gjë e cila është e papranueshme dhe se ne nuk do të jemi në krahun e tij duke e lejuar të dëmtojë demokracinë e gjallë shqiptare, por ende të brishtë.

-Berisha duhet të dëgjojë nga ana juaj se zgjedhjet e përgjithëshme do të jenë një tregues se sa serioze është demokracia shqiptare dhe nuk do të shikohen si një çështje teknikalitetesh, por seriozitet i normave demokratike.

E.G.