Numri i të papunëve, shumë larg 1-milionëshit...

Shifrat e papunësisë kanë qenë një temë e nxehtë e debati politik mes Socialistëve dhe Demokratëve. Kur ishin në opozitë, Socialistët deklaronin se shifra zyrtare e papunësisë (146 mijë të papunë) nuk ishte reale, duke pretenduar se në Shqipëri ekzistonin 1 milion të papunë.

Në një intervistë dhënë të djelën Top Channel-it, Fahrad Mehrani, konsulent i INSTAT-it, tha se: “Standardet ndërkombëtare mbi punësimin dhe papunësinë kanë ndryshuar në tetor të vitit të kaluar, pas 31 vjetësh. Kështu që është natyrale që INSTAT-i, i cili do të ndjekë standardet ndërkombëtare, të adoptojë më të fundit. Norma e papunësisë, bazuar në metodën e vjetër, ishte rreth 13%. Me standaret e reja, papunësia në Shqipëri është 21%.”

Më tej Merhani sqaroi se “Arsyeja kryesore lidhet me trajtimin e personave që punojnë për të siguruar jetesën, veçanërisht në bujqësi. Këta janë fermerë që prodhojnë kryesisht për veten e tyre, jo për të shitur. Në Shqipëri janë rreth 300 mijë të tillë. Deri tani këta quheshin si të punësuar. Por, me standardin e ri kjo kategori nuk konsiderohet si e punësuar. Ajo pjesë e tyre që bën presion në treg, duke kërkuar punë, do të regjistrohen si të papunë dhe janë rreth 40 mijë të tillë.”

Në buletinin e fundit të INSTAT-it, publikuar në 21 janar 2014 (http://www.instat.gov.al/media/222829/anketa_tremujore_e_forcave_t__pun_s__tr_3_2013.pdf ), shifra e të punësuarve ishte 928,456 persona dhe e të papunëve ishte 188,944 persona. Pra totali i forcave aktive të punës ishte  1,117,400. Duke përdorur 21-përqindëshin e Mehranit, i bie që shifra e rillogaritur e të papunëve duhet të jetë rreth 235 mijë. Por kjo shifër është shumë larg 1-milionëshit të pretenduar nga socialistët...

Në fakt, në intervistën e tij, Mehrani shkoi edhe më tej. “Paralelisht, janë edhe të punësuarit me pak orë që duan të punojnë më shumë. Gjithashtu është edhe kategoria e të dekurajuarve. Në standardet e reja, këto përkufizime janë qartësuar dhe po ashtu edhe mënyra se si llogariten. Nëse i shtojmë dhe këto dy kategori në shifrën e papunësisë në Shqipëri, ajo shkon 40%. Pra, totali i njerëzve që janë ose të papunë, ose të nënpunësuar, ose të dekurajuar është rreth 40%,” deklaroi ai.

Sipas faqes së internetit të CIA-s, kjo shifër vlerësohet të jetë 30% (https://www.cia.gov/library/publications/the-world-factbook/geos/al.html), por le ta quajmë të mirëqenë shifrën e Mehranit.

Meqë ai nuk sqaroi se sa janë të punësuarit me pak orë që duan të punojnë më shumë (të nënpunësuarit) dhe sa janë të dekurajuarit, po abstragojmë se numri i tyre është i barabartë. Bazuar në këtë abstragim, arrijmë në shifrën ekstreme të 470 mijë të papunëve. Prapë, shumë larg 1-milionëshit të pretenduar nga Socialistët, kur ishin në opozitë...

Kjo mospërputhje e akuzave që bëjnë partitë kur janë në opozitë, me shifrat që gjejnë kur vijnë në pushtet, është sëmundje e kahershme e tranzicionit 23-vjeçar shqiptar. Dhe shembulli i mësipërm duhet të shërbejë edhe si mësim për opozitën aktuale, që të mos bëjë akuza në ajër. Sepse nesër mund të vijë përsëri në pushtet dhe do t’i duhet të ballafaqojë akuzat e sotme me shifrat që do të gjejë kur të ketë drejtimin e vendit...