Njoftimi i munguar i takimit Gray-Basha

Siç është bërë e ditur nga media e shkruar e ajo televizive, kryebashkiaku i Tiranës, z.Lulzim Basha, zhvilloi ditët e fundit një vizitë në SHBA, me ç’u tha, me ftesë zyrtare të Kryetarit të Bashkisë së Uashingtonit, z.Vincent Gray.

A ishte takim sipas një ftese zyrtare apo me kërkesë të një shqiptaro-amerikani që ndërhyri pranë z.Gray që të priste për kortezi z.Basha (kjo e fundit sipas zëdhënësit të z.Gray)? Tashmë kemi një takim të realizuar midis dy kryebashkiakëve dhe le të mos e vijojmë më tej këtë debat, në dukje “pa rëndësi”.

Po çfarë ndodhi me pasqyrimin në realitet të këtij takimi? Këtej nga ne, Bashkia e Tiranës, përpos njoftimeve që dha media, u kujdes që ta paraqiste menjëherë takimin (me foto dhe përshkrim) edhe në website-n e vet (shih linkun: http://www.tirana.gov.al/?cid=1,62,4389). Gjithashtu, i njëjti material u përcoll edhe në rrjetin social Facebook, në faqen zyrtare të L.Bashës.

Ndërkohë, te pala tjetër, nuk gjen asnjë njoftim për këtë takim. Jo vetëm  në website-n e Bashkisë së Uashingtonit (shih linkun zyrtar: http://dc.gov/DC/, linkun e takimeve: http://mayor.dc.gov/DC/Mayor/About+the+Mayor/News+Room/Press+Releases, linkun e fotove:  http://mayor.dc.gov/DC/Mayor/News+Room/Photo+Gallery), por as në faqet e rrjeteve sociale të kësaj bashkie, Facebook: (http://www.facebook.com/#!/dcgov?sk=wall), Twitter: (http://twitter.com/mayorvincegray) dhe YouTube: (http://www.youtube.com/user/dcgovernment#g/u), nuk gjen pasqyrim ky takim.

Aty gjen plot informacione për takime të ditëve të fundit të kryebashkiakut Gray, por asnjë me homologun Basha, të cilit, sipas këtij të fundit “z.Grey i ka ofruar ndihmë në krijimin e zyrës së punësimit, ndërtimin e linjës së tramit, përmirësimin e cilësisë së jetës duke nisur me hapësirat e gjelbra dhe cilësinë e ajrit, si dhe do t’i vërë në shërbim planin e zhvillimit të Uashingtonit”. Kaq shumë ta ketë shpërfillur ai, “të ftuarin e tij zyrtar”, sa të mos i kushtojë as dy rreshta njoftim e një foto për ilustrim pas gjithë këtyre angazhimeve të marra?! Çudi!