Hashash opozitar

Nuk dihet pse për çështje që quhen të “inteligjencës”, PD nxori më “inteligjentin” e saj dhe meqenëse bëhej fjalë për lëndë psikotrope, e shoqëroi me deputetin më “esëll” të parlamentit, në sulmin ndaj Ministrisë së Mbrojtjes. Me siguri, për shkak se kush ka dy pare mend dhe dy gisht cipë, nuk ka pranuar të dalë në podium dhe artikulojë pyetjet që edhe një hetues i ‘45-ës, i sapo zbritur nga mali e pa shkollë, do të kishte aq sqimë profesionale për mos i bërë. 
A është ajo në dijeni të shqetësimit për përdorim të mundshëm të infrastrukturës të forcave të armatosura në trafikun e drogës? A ka informacion ajo se si ka ndodhur që forcat tona të armatosura, pjesë e NATO-s, janë vënë në shërbim të trafikut të drogës? Cilat janë masat që ajo ka marrë përballë këtyre fakteve skandaloze? Ishin tri pyetjet e udhëheqësve të rinj të PD-së, shpresë e opozitarizmit shqiptar. Kodheli duhet të jetë o shejtan, o evlia të ketë dijeni për një gjë që nuk ndodh; informacion që ushtria është vënë në shërbim të trafikut që nuk e bën; e të marrë masa për fakte që shohin në ëndrra pyetësit e saj. 
Është e vërtetë se një pjesë e narkotrafikantëve shqiptarë në fillesat e rrugës së tyre të krimit janë marrë në qafë nga filmi “Scarface”, ku luan Al Paçino, ashtu siç ngjan se opozita në fantazitë e saj të fundmit mund të jetë frymëzuar nga seriali i Escobarit. Por nëse një adoleshent merr në qafë veten e tij duke ju futur trafikut ilegal, opozita që krijon skenarë politikë duke u nisur nga skenarë telenovelash është në pikë të zezë. Pasi asnjë gazetari, lëre më një parti që ka gjithë ato resurse, nuk mund t’i lejohet të flasë përçart. 
Me një analizë minimale që nuk kërkon ekspertizë të lartë, zbulohet se nëse dikush tek Ministria e Mbrojtjes do të ishte i interesuar të bënte trafik droge nga Shqipëria në drejtim të Italisë, së pari duhet të “qorronte” vëzhgimin detar. Çuditërisht është kjo qeveri që riparoi radarët që kishin 3 vjet të prishur. Nisur nga faktet, kush mund të ketë pasur lidhje me trafikantët, këta që i rregulluan apo ata që i lanë prishur radarët? E mbani mënd Berishën që akuzonte opozitën socialiste si proserbe, ndërkohë që e kishte lidhur marrëveshjen me Millosheviçin ta furnizonte me karburant në kohën e embargos. Dishepujt e tij kanë goxha mësues. 
Qendra e kontrollit të detit, pra menaxhuesi i radarëve quhet me akronimin QNOD. Kush ka pak durim, mund të hyjë në internet, në faqen e Ministrisë së Mbrojtjes dhe gjen të gjitha hollësitë. Brenda saj kanë përfaqësues gjashtë ministri. Shto edhe të huajt. Duhet të kesh goxha fantazi konspirative që vetëm një aktor mund t’i ketë, për të shkuar deri këtu, sa të mendosh se edhe ky organ bëhet pre e trafikantëve të rrugës detare. 
Që të kthehemi tek filmi i Escobarit, opozita mund të mendojë trafikun me avionë. A ka mundësi të bëhet kjo lloj kontrabande me bazë Shqipërinë? Kush ndjek me sado pak vëmendje shtypin dhe ka memorie, e di se hapësira jonë ajrore vëzhgohet nga aleanca e NATO-s. Edhe avionët patrullues janë të aleancës, respektivisht Italisë dhe Greqisë. Jo më larg se në Gioia del Colle, 20 kilometra larg qytetit të Barit, italianët kanë një bazë avionësh gjuajtës bombardues F16. Po në brigjet e Pulias janë pikat e radarëve që mund t’i shikosh me një udhëtim të shpejtë me makinë. Në Bari ndodhet Komanda e Rajonit të Tretë Ajror, që mbron e vëzhgon jugun e Italisë. Si mund të mendohet që nga Shqipëria bëhet trafik narkotikësh nga ajri, ndërsa aerodromi i Gjadrit është jashtë përdorimit? Si mund të mendohet se është korruptuar gjithë zinxhiri i komandës së NATO-s dhe ushtria italiane, që të lejojë trafikun shtetëror shqiptar të drogës? Një katundari, roje reparti që e ka zënë lapsi i reformës, mund t’i lejohet të fantazojë. Por kur pre e spazmave trunore që vijnë nga inati, marazi, kapsllëku i një fshatari bëhet edhe opozita, atëherë dikush këtu është për të qarë hallin. 
Meqenëse demokracia e do që në krye të disa viteve, kush qeveris ndërrohet, nëse PD vazhdon me këtë lloj udhëheqësie, ditë të bardha vijnë për ne. “Lum kush të rrojë/ ta shohë zonjë”, tha Naimi. Mbase gëzohet aty lart në qiell ku është, që mbylli sytë pa e parë e provuar në kurriz, se çfarë shakash mund t’i bëjnë vetes shqiptarët.

"Gazeta Shqiptare"