BAROMETËR24: Llogoret elektorale jo aq të thella…

Duke ditur sa i thellë ka qenë polarizimi politik i elektoratit shqiptar në këto dy dekada, prisja që sonda e parë e sondazhit periodik BAROMETËR24 (që e prezantova në NEWS24 - http://respublica.al/opinion/2013/10/16/ctregojne-kuotat-e-rames-bashes-dhe-metes-ne-barometer24-etj ) të pasqyronte një ndarje si me thikë të opinioneve mes dy sinoreve të mëdha elektorale. Meqë përzgjedhja e kampionit, gjeografikisht, demografikisht e politikisht, u bë në mënyrë të tillë që të përfaqsonte sa më saktë hartën elektorale të 23 qershorit, kisha bindjen se në sondën e parë do të shihja një ndarje afërsisht 60%-40% në opinonet për Ramën, Bashën, qeverinë, ekonominë e vendit, situatën e rendit etj. Ndërsa luhatjet nga kjo ndarje prisja t’i shihja në sondat pasardhëse të këtij sondazhi periodik, në të cilin i njëjti kampion do të sondohet çdo muaj rreth të njëjtave opinone.

Por, përkundër pritmërisë sime, qysh në sondën e parë, më rezultoi se llogoret elektorale shqiptare nuk janë aq të thella sa ç’i mendoja. Dhe kjo përmbysje e pritshmërisë më kujtoi fjalët e Andreas Schleicher: “Pa të dhëna, je thjesht një dikush me një hamendje.”

Kështu, të dhënat e sondës së parë të BAROMETËR24-ës më treguan se, vërtet kuota e opinionit pozitiv për Ramën ishte pothuaj e barabartë me kuotën që arriti koalicioni i udhëhequr prej tij në 23 qershor (57% vs. 58%), por kuota e opinonit negativ për të ishte më e ulët se kuota që arriti koalicioni i djathtë në 23 qershor (34% vs. 40%). Gjë që do të thotë se një pjesë e elektoratit të djathtë nuk e sheh Ramën si “armik”.

Ndërkohë vetëm 40% e të anketuarve, ose më pak se treçereku i votuesve të majtë e kanë miratuar “Fushatën e fotove të bodrumeve të institucioneve”, që Rama zhvilloi në dy javët e para të qeverisjes së tij. Gjë që do të thotë se një pjesë e mirë e votuesve të majtë nuk mund të kapërdijnë symbyllazi çdo çalltisje të “Komandantit”.

Një situatë edhe më interesante vihet re tek opinioni i të anketuarve për Bashën. Vërtet kuota e opinionit pozitiv për të është pothuaj e barabartë me kuotën që arriti koalicioni i djathtë në 23 qershor (41% vs. 40%), por kuota e opinonit negativ për Bashën ishte ndjeshëm më e ulët se kuota e koalicionit kundërshtar në 23 qershor (44% vs. 58%). Gjë që do të thotë se një goxha pjesë e elektoratit të majtë nuk e sheh Bashën si “armik”.

Nga ana tjetër, vetëm 21% e të anketuarve janë të bindur se rendi nuk po përmirësohet nën qeverisjen aktuale (60% japin përgjigje pozitive dhe 19% asnjëanëse). Gjë që do të thotë se pothuaj gjysma e elektoratit të djathtë është aq mendjehapur sa të mos e ngjyrosë me të zezë apriori çdo përpjekje të qeverisë aktuale, thjesht pse ajo i përket “kampit armik”.

Duke u futur brenda kampit të majtë, një sheshim i llogoreve vihet re edhe mes dy partive të mëdha qeverisëse, të cilat kanë qenë armike të betuara pothuaj në të gjithë dekadën e fundit. Kështu kuota e opinionit pozitiv për Ramën nuk do të arrinte dot nivelin 57%, nëqoftë se votuesit e LSI-së të anketuar në sondazh nuk do të shprehnin opinion pozitv për të. Nga ana tjetër, kuota e opinionit pozitiv për Metën nuk do të arrinte dot nivelin 44%, nëqoftë se një pjesë e mirë e votuesve të PS-së të anketuar në sondazh nuk do të jepnin opinion pozitv për të.

Këto shenja të sheshimit të llogoreve elektorale, pas 4 vjetëve të luftës tejet të ashpër politike mes palëve, ndoshta sinjalizojnë futjen e demokracisë shqiptare në rrugën e gjatë drejt pjekurisë. Në fund të fundit, ajo e kaloi pragun empirik të fillimit të pjekurisë së një demokracie – arriti të prodhojë dy rrotacione paqësore rradhazi pushteti. Plot pas 101 vjetësh të ekzistencës së shtetit shqiptar…