Vizitë e vonuar, këshilla “da manuale”

Kanë mbërritur në Tiranë – ishim njoftuar prej ditësh për këtë gjë – ministri i Jashtëm i Italisë, Franco Frattini, dhe ai i Greqisë, Stavro Llambrinidis. Është një vizitë që synon ngritjen e urave të dialogut mes palëve të politikës shqiptare dhe përafrimin e qëndrimeve të tyre, s’ka gjë se të dy diplomatët e rëndësishëm të Europës synuan ta zgjeronin objektivin e kësaj vizite shumë më tepër se sa kaq. Nuk dihet ç’është biseduar kokë më kokë në takimet me të zotët e shtëpisë, Topin, Berishën, Ramën, por gjasat janë që të jenë shprehur po ato mendime që ata nyjëtuan në përfundim të këtyre takimeve, në një konferencë të përbashkët për shtypin. Është fjala për qëndrime cliché, si “integrimi është një objektiv për shumicën dërrmuese të popullit”, ose “ne jemi mbështetës të përzemërt të Shqipërisë dhe të ardhmes europiane”, ose “mesazhi që duam të përcjellim është nevoja e bashkimit kombëtar në rrugën drejt Europës”, ose “Shqipëria i ka të gjitha mundësitë që të plotësojë kërkesat e BE-së”, ose “rruga drejt BE-së është e vështirë, ka nevojë për përgatitje rigoroze, bashkëpunim mes forcave politike”, ose “e rëndësishme është që opozita dhe mazhoranca të bëjnë ç’është e mundur të ketë një funksionim normal të parlamentit”, etj, etj.

Nuk kuptohet mirë, pse këta ministra nuk erdhën kohë më parë, kur kriza politike ishte në pikun e vet, por parapëlqyen këtë moment, kur opozita ka adoptuar një qasje vendosmërisht “konstruktive e institucionale”.

E.G.