Socialistët kanë rastin të bëjnë një garë të fortë për kreun e PS-së së Tiranës

Ka disa ditë që shtypi po flet për garën mes socialistëve për të marrë kreun e PS-në në Tiranë, dhe ka përcjellë mesazhin se kandidati kryesor është kryetari i komanduar Saimir Tahiri, deputet. Mirëpo tok me Tahirin janë përmendur dhe emra të tjerë të rëndësishëm, si Ilir Gjoni, Ilir Zela, Alfred Dalipi, Andis Harasani, Erjon Braçe. Këta të fundit nuk është se kanë shpallur që do jenë pjesë e garës, por as nuk i kanë përgënjeshtruar lajmet që dalin nga gazeta-leaks-at, ku përmenden emrat e tyre. Disa syresh kanë shprehur dhe objeksione lidhur me garën, apo me ndonjë kandidat. Madje, Ilir Gjoni është shprehur, se ka një papajtueshmëri statutore mes postit të kryetarit të PS-së së një rrethi dhe përgjegjësisë së deputetit, por kjo gjë nuk është nënvizuar nga të tjerë.

Ky lloj interesi i medias, së bashku me një ambicje të disa personazheve të rëndësishëm të kësaj partie, duket si një rast i mirë për PS-në për të demonstruar se është demokratike (Rama, në bisedën me Bugajskin, e krahasoi partinë e tij me Partinë Demokratike e atë Republikane në SHBA). Emrat që kanë dalë, nëse kanë dalë, janë një premtim për një garë të fortë e interesante. Në një grupim normal politik, jo vetëm do duhej të lejohej një konkurim i fortë, por dhe do duhej të nxitej e inkurajohej. Nga gara veç të mira ka. Kuptohet, në një parti demokratike.

Re.Pu.