Leksione nga Gjermania

Nga fabula presidenciale gjermane vijnë disa leksione; e nuk është se vijnë vetëm për ne, shqiptarët; jo, janë leksione dhe për të tjerë. Leksioni nr. 1: një prokuror i ri s’e ka fare për gjë të ngrejë një padi për kreun e shtetit, e të kërkojë imunitetin e këtij të fundit. Leksioni nr. 2: vetë kreu i shtetit nuk zgjedh mbrojtjen e keqe duke kërkuar e denoncuar përbetime e komplote kundër tij (kjo mbrojtje është një tabiat politikanësh në shumë vende të botës); përkundrazi, ai jep dorëheqjen dhe i hap rrugë hetimit e gjykimit; dhe padia ka të bëjë me një çështje, që gjetkë mund të konsiderohej çikërrimë (për në Shqipëri as që mund të flitet).

Por fabula presidenciale nuk mbaron këtu. Iku Wulff-i, por do duhet të zgjidhet i riu. Dhe historia nuk po tirret gjatë. Merkeli ka rënë dakord mbi një kandidaturë të propozuar e të pëlqyer nga opozita, nga social-demokratët. Është fjala për Joachim Gauck-un, heroin e disidencës në kohët e regjimit komunist të Gjermanisë Lindore. Dhe ky është leksioni nr. 3: Politikanët gjermanë nuk u tërhoqën nga interesat e hesapet egoiste, por bënë një zgjedhje që gjykohet se është në të mirë të vendit; dhe e bënë “pa shumë ceremonira”.

E.G.